विशेष अनलाइन । पहिल्यै इटहरीको डान्स क्षेत्रमा चर्चाको शिखरमा पुगेको ‘युनाइटेड थर्टिन’ डान्स सेन्टर पुनः संचालनमा आएको छ। पुनः उद्घाटन कार्यक्रममा चर्चित हास्य गायक श्रीकृष्ण लुइटेल ‘बोकेदारी’ प्रमुख आतिथिको रुपमा उपस्थित रहे।
कार्यक्रममा निर्देशक प्रकाश सुब्बा, चलचित्रकर्मी महासंघ कोशी प्रदेशका महासचिव दिनेश कोइराला, निर्देशक तथा पत्रकार नवीन गुरुङ ‘गुरुङ सोल्टी’, गायक फिलिप सुनुवार, कोशी भिजन फिल्म्सका प्रोपोराइटर तथा छायाकार सुमन योञ्जन, कोरियोग्राफर आशिष् बुढाथोकी, अभिनेत्री इच्छा गुरुङलगायत व्यक्तिहरूको उपस्थिति रह्यो।
युनाइटेड थर्टिनलाई लामो समयपछि पुनः सक्रिय बनाउँदै रोशन कमल पराजुलीले नयाँ ऊर्जा र व्यवस्थापनसहित एकेडेमी पुनः संचालनमा ल्याएका हुन्। एकेडेमीका मुख्य प्रशिक्षक आशिष् बुढाथोकी रहनेछन् भने सह–प्रशिक्षकको जिम्मेवारी केसब दियालीले सम्हाल्ने जनाइएको छ।
एकेडेमीमा जुम्बा, एरोबिक्स, मोडर्न फमहरू, हिप–हप, बी–बोइङ, नेपाली लोकनृत्य, भेसाभूषा तालिम, म्युजिक भिडियो तथा फिल्म डान्स कोरियोग्राफी, स्टेज शो डान्स, कोरोना (कोरियोग्राफी + फ्यूजन) तथा मोडेलिङ सम्बन्धी तालिम उपलब्ध हुनेछन्। क्लास समय बिहान ४:३० देखि ६:३० र साँझ ४:३० देखि ६:३० सम्म रहनेछ।
प्रमुख अतिथि श्रीकृष्ण लुइटेल ‘बोकेदारी’ले डान्स क्षेत्रले युवाहरूलाई अनुशासन, तालिम र आत्मविश्वास दिलाउने बताए।
“इटहरीमा कला तथा मनोरञ्जनको गति बढ्दै गएको छ। युनाइटेड थर्टिन फेरि संचालनमा आउनु आफैंमा सकारात्मक कुरा हो। युवाले उपलब्ध अवसरलाई सदुपयोग गर्नुपर्छ,” उनले भने।
निर्देशक प्रकाश सुब्बाले यस्ता एकेडेमीहरूले प्रतिभालाई पहिचान दिन मद्दत पुर्याउने उल्लेख गर्दै भने,
“स्थानीय प्रतिभा पलाउने ठाउँ यिनै हुन्। प्रशिक्षकका अनुभवले नयाँ पुस्तामा थप जोश भरिदिनेछ।”
चलचित्रकर्मी महासंघ कोशी प्रदेशका महासचिव दिनेश कोइरालाले डान्स–संगीत क्षेत्रलाई व्यवस्थित बनाउन युनाइटेड थर्टिनले ठूलो भूमिका खेल्ने विश्वास व्यक्त गरे। “फिल्म, म्युजिक भिडियोदेखि स्टेज कार्यक्रमसम्म प्रशिक्षित कलाकारको माग बढ्दो छ। युनाइटेड थर्टिनले त्यस मागलाई पूरा गर्न सफल हुनेछ,” उनले भने।
कार्यक्रममा बोल्दै निर्देशक तथा पत्रकार नवीन गुरुङ ‘गुरुङ सोल्टी’ ले युनाइटेड थर्टिन पुनः संचालन हुनु इटहरीको कला–सांस्कृतिक वातावरणका लागि ठूलो उपलब्धि भएको बताए। “डान्स केवल मनोरञ्जन मात्र होइन, यो अनुशासन, मेहनत र आत्मअभिव्यक्तिको माध्यम हो। युनाइटेड थर्टिन जस्ता संस्थाले स्थानीय स्तरमा प्रतिभा खोज्न, सिकाउन र देशभर चिनाउने भूमिका खेलिरहेका छन्। प्रशिक्षकको अनुभव, व्यवस्थापनको दृष्टि र कलाकारहरूको उत्साह हेर्दा यो एकेडेमी फेरि पहिलेजस्तै चम्किनेमा मलाई शंका छैन,” उनले भने।
सञ्चालक रोशन पराजुलीका अनुसार युनाइटेड थर्टिन पुनः शुरुआतको अवसरमा छिट्टै आएका सदस्यहरूलाई विशेष छुटको व्यवस्था गरिएको छ। “हामीले गुणस्तरीय तालिम, अनुशासित वातावरण र पेशेगत सम्भावनालाई हेरेर क्लास सञ्चालन गरेका छौँ। सुरुआती दिनमै आउनेलाई विशेष सहुलियत दिने निर्णय लिएका छौँ,” पराजुलीले बताए।
इटहरीमा कला, डान्स र मनोरञ्जन क्षेत्रलाई फेरि नयाँ उचाइ दिन ‘युनाइटेड थर्टिन’ एकेडेमीले ठूलो योगदान पुर्याउने अपेक्षा लिइएको छ।
Discussion about this post