बिशेष अनलाइन । नेपाली चलचित्र ‘एक्स ९’का लागि बलिउड अभिनेता सुनिल सेट्टीलाई अफर गरिएको छ । वलिउड अभिनेता सुनिललाई भिलेनको भूमिकाका लागि अफर गरिएको बताइएको छ । चलचित्र ‘लप्पन छप्पन र लप्पन छप्पन २’का निर्देशक मुकुन्द भट्टले यो चलचित्रको निर्देशन गर्न लागेका छन् । निर्देशक भट्टका अनुसार सुनिलसँग मौखिक कुराकानी भैसकेको छ । सुनिल चलचित्रमा काम गर्न सकारात्मक रहेको बताइएको छ ।
सुनिलले दिनको पारिश्रमिक लिने भएकाले एक सातामा नै उनको छायांकन सक्ने योजना निर्माणपक्षको छ । सुनिलका लागि एक साताको समय माग गरिएको छ ।
यो चलचित्रको छायांकन नेपाल, भारत र यूरोपका विभिन्न देशमा गर्ने तयारी भइरहेको निर्देशक भट्टले जानकारी दिएका छन् । चलचित्रका लागि अभिनेता अनमोल केसीलाई पनि अफर गरिएको छ । निर्देशक भट्टले अनमोललाई चलचित्रका लागि ७५ लाख पारिश्रमिक सहित अफर गरेका थिए ।
अनमोल पनि चलचित्रमा काम गर्न तयार रहेको निर्देशक भट्टले जानकारी दिए । कागजी संझौता हुन बाँकी भए पनि सामान्य परिस्थितिमा आफुलाई उक्त चलचित्रमा काम गर्न कुनै समस्या नभएको अनमोलले पनि बताएका थिए । यसको मतलब अनमोल ७५ लाख रुपैया लिएर चलचित्रमा काम गर्न तयार देखिएको छन् ।
चलचित्रलाई विश्व बजारमा प्रदर्शन गर्ने योजनामा निर्माण पक्ष रहेको छ । कोभिडको नयाँ लहर नआएको खण्डमा तिहारपछि चलचित्रको छायांकन सुरु गर्ने योजना रहेको निर्देशकले जानकारी दिए । अभिनेता अनमोल केसी सँगै चलचित्रमा अभिनेता पुष्प खड्काको पनि भुमिका रहेको बताइएको छ । अभिनेता पुष्प खड्कासँग पनि यस बिषयमा कुरा भइसकेको र पुष्प चलचित्रमा काम गर्न तयार भएको बताइएको छ ।
निर्देशक तथा अभिनेता निश्चल बस्नेत र अभिनेता सौगात मल्लसँग पनि मौखिक सहमती भइसकेको छ । चलचित्रमा मुख्य भुमिकामा भने अनमोल केसी नै रहने बुझिएको छ । अभिनेत्री कसलाई अफर गर्ने भन्ने विषयमा अहिले नै फाइनल् भइनसकेको निर्देशक भट्टले बताएका छन् ।
Discussion about this post