विशेष अनलाइन । निर्वाचनको चहलपहलले गर्दा धेरैजसो चलचित्रको काम सुस्ताएको भए पनि ‘लालिमा’ ले भने आफ्नो प्रचारप्रसारलाई निकै तीव्रता दिएको छ। निर्वाचन लगत्तै प्रदर्शन हुने भएकाले निर्माण टोली अहिले पत्रकार सम्मेलन गर्ने र ट्रेलर सार्वजनिक गर्ने काममा व्यस्त छ। अन्य चलचित्रको गतिविधि खासै नदेखिएका बेला ‘लालिमा’ ले भने बजारमा आफ्नो छुट्टै प्रभाव जमाउन सफल भएको छ।
यसैबीच, निर्माण टोलीले सार्वजनिक गरेको चलचित्रको ट्रेलरले २४ घण्टा पनि नबित्दै युट्युबको ट्रेन्डिङमा स्थान बनाउन सफल भएको छ। चलचित्रका लेखक तथा निर्देशक रोशन मिराजका अनुसार यसमा यौनकर्मीहरूको वास्तविक जीवन र उनीहरूले भोग्नुपर्ने यथार्थलाई देखाइएको छ। अहिलेसम्म पर्दामा नआएको नयाँ र फरक कथावस्तु यस चलचित्रमा समेटिएको निर्देशकको दाबी छ।
यस चलचित्रको मुख्य भूमिकामा अभिनेत्री रोश्नी कार्की छिन्, जसले एक यौनकर्मीको पात्र निभाएकी छिन्। रोश्नीका अनुसार यो चलचित्रले यौनकर्मीहरूको कामलाई मात्र नभई उनीहरूको मानसिक पीडा, बाध्यता र समस्याहरूलाई पनि गहिराइबाट देखाउन खोजेको छ। समाजको हेराइ र आफ्नै परिस्थितिबीच उनीहरू कस्तो मानसिक अवस्थाबाट गुज्रन्छन् भन्ने कुरा यसमा मुख्य रूपमा उठाइएको छ।
अर्की अभिनेत्री उषा रजकले यसमा फरक क्षमता भएकी (बोल्न नसक्ने) आमाको भूमिका निर्वाह गरेकी छिन्। उषाको यो फरक अवतार दर्शकका लागि निकै रोचक हुने देखिएको छ। रोश्नी र उषाका साथै चलचित्रमा जीवन भट्टराई, सुष्मा निरौला, घनश्याम जोशी, सबिन कट्टेल र शिशिर वाङ्देलको पनि महत्वपूर्ण अभिनय रहेको छ।
फेथ आस्थाको प्रस्तुति र रीना लामा कार्यकारी निर्माता रहेको यो चलचित्र आगामी फागुन २९ गते अन्तर्राष्ट्रिय महिला दिवसको अवसर पारेर प्रदर्शनमा आउँदैछ। नेसनल सिने ग्रुप नेपालले वितरण गर्न लागेको छ।
Discussion about this post