विशेष अनलाइन। आगामी माघ ९ गतेबाट देशभर प्रदर्शनको तयारीमा रहेको चलचित्र ‘परिवर्तन’ ले आफ्नो प्रचार अभियानलाई तीव्रता दिँदै पहिलो गीत सार्वजनिक गरेको छ। क्रिसमस डेको अवसर पारेर बिहीबार सार्वजनिक गरिएको ‘पाकेको चिउरी’ बोलको गीतले युवायुवतीबीचको प्रेम, सामीप्यता र आकर्षणको सुन्दर भावलाई समेटेको छ। सार्वजनिक भएको केही समयमै यस गीतले सामाजिक सञ्जालमा दर्शकको सकारात्मक ध्यान खिच्न सफल भएको छ।
प्रेमिल गीतमा लोकप्रिय गायक एसडी योगी र गायिका रेश्मा पुनको सुमधुर स्वर सुन्न सकिन्छ। संगीतकार स्वयं एसडी योगीले नै यसमा लय भर्ने काम गरेका छन् भने मौसम अर्यालले शब्द सिर्जना गरेका हुन्। गीतको संगीत र लयले चलचित्रको रोमान्टिक पक्षलाई बलियोसँग उजागर गरेको छ, जसले गर्दा यसलाई यस वर्षको चर्चित ‘प्रेम गीत’ मध्ये एक मान्न सकिने निर्माण पक्षको दाबी छ।
भिडियोतर्फ रामजी लामिछानेको आकर्षक कोरियोग्राफीमा चलचित्रका मुख्य पात्रहरू सुशील श्रेष्ठ र अञ्जना बराइलीलाई फिचर गरिएको छ। सुशील र अञ्जनाको नृत्य र उनीहरूबीचको ‘अनस्क्रिन’ केमेस्ट्रीले भिडियोलाई निकै जीवन्त बनाएको छ। निर्माण टोलीका अनुसार यो गीत केवल मनोरञ्जनका लागि मात्र नभई चलचित्रको कथासँग प्रत्यक्ष जोडिएको एक महत्वपूर्ण कडी हो, जसले पात्रहरूको सम्बन्धको गहिराइलाई झल्काउँछ।
विजय केरुङको निर्देशनमा तयार भएको यस चलचित्रमा नेपाली पर्दाका स्थापित कलाकारहरूको प्रभावशाली उपस्थिति छ। सुशील र अञ्जनाका साथमा करिश्मा मानन्धर, सरोज खनाल, बुद्धि तामाङ, हेमन्त बुढाथोकी, सुवास मेचे, पुकार भट्टराई लगायतको सशक्त अभिनय हेर्न पाइनेछ। दीपक सिवाकोटीले निर्माण गरेको यस चलचित्रको कथा पनि स्वयं उनकै हो भने शिवम् अधिकारीले पटकथा तथा संवादलाई अन्तिम रूप दिएका हुन्।
प्राविधिक रूपमा पनि ‘परिवर्तन’ निकै मजबुत देखिएको छ। दक्षिण भारतीय सिनेमामा ख्याति कमाएकी एम. गीता गुरप्पाले यसमा साउन्ड डिजाइन गरेकी छिन् भने शिव ढकालको छायाङ्कन र श्री श्रेष्ठको द्वन्द्व निर्देशन रहेको छ। युवापुस्ताको विद्रोही सोच, देशप्रतिको उत्तरदायित्व र समाज सुधारको भावनालाई मुख्य विषयवस्तु बनाएको यस चलचित्रले माघ ९ बाट हलहरूमा नयाँ उर्जा भर्ने अपेक्षा गरिएको छ।
Discussion about this post