विशेष अनलाइन । पिताम्बर र कर्मा – दुई एक्सनप्रधान नेपाली चलचित्र शुक्रबारदेखि एकसाथ प्रदर्शनमा आएका छन्। एउटै जनराका यी दुई फिल्मले बक्स अफिसमा कस्तो प्रभाव पार्लान् भन्नेमा दर्शकदेखि फिल्मकर्मीहरूसम्म चासो बढेको छ।
पिताम्बरमा प्रदीप खड्का, दयाहाङ राई, सौगात मल्ल, आर्यन सिग्देल, अनुप विक्रम शाही, सुरक्षा पन्त, गौरी मल्ल, रविन्द्र झा र प्रमोद अग्रहरीजस्ता स्टार कलाकारहरूको जमघट छ। यो चलचित्रलाई कृषा चौलागाईंले निर्देशन गरेकी हुन्। ट्रेलर सार्वजनिक भएसँगै यसले बलियो कथा र सशक्त प्रस्तुति दिने संकेत देखाएको छ।
यता कर्मामा विपिन कार्की, उपासना सिंह ठकुरी, मुकुन भुसाल र दिव्य देवको अभिनय रहेको छ। विपिन कार्कीको एक्सन अवतार हेर्ने कौतुहलता धेरैमा देखिएको छ, किनकि उनी प्रायः गम्भीर, मनोवैज्ञानिक वा हाँस्य भूमिकामा देखिँदै आएका छन्। कर्मालाई शौरभ चौधरीले निर्देशन गरेका हुन्।
प्रचार–प्रसारमा दुवै चलचित्रले कुनै कमी गरेका छैनन्। देशका प्रमुख सहरहरूमा क्याम्पेन, मिडिया इभेन्ट, सामाजिक सञ्जाल, भिडियो सामग्री, ट्रेलर लन्चदेखि स्टारहरुको सहभागिता झल्किने कार्यक्रमहरू हुँदै आएका छन्।
एकैसाथ दुई एक्सन चलचित्र प्रदर्शनमा आउनु आफैंमा कमै हुने घटना हो। दर्शकबीच अहिले यही बहस छ—पिताम्बरको स्टारकास्ट जित्ने कि कर्माको कथावस्तु? प्रेमप्रधान फिल्महरूको भीडबीच एक्सन जनराको यो आगमनले नेपाली चलचित्र बजारमा नयाँ तरंग ल्याउने अपेक्षा गरिएको छ।
२०७८ देखि ८० सम्म राम्ररी जमेको रोमान्टिक ट्रेन्ड अब क्रमशः कम हुँदै जाने र अब पुनः एकपटक एक्सन जनरा फर्किन सक्ने धेरैको आकलन छ ।
पिताम्बर र कर्मा दुबै २०८१ सालका अन्तिम मुख्य चलचित्र पनि हुन्। नयाँ वर्षको संघारमा कुन चलचित्रले दर्शकको मन जित्नेछ भन्ने प्रश्नको जवाफ भने अब पर्दामै खुल्नेछ।
Discussion about this post