मनोज दाहाल । अभिनेत्री पूजा शर्मा अभिनीत चलचित्र ‘दान्भी’ यही असार ७ गते शुक्रवारबाट अलनेपाल प्रदर्शनमा आउँदै छ । चलचित्रमा पूजालाई एक्सन लेडीका रूपमा देखिँदै छ । चलचित्र थ्री लभरबाट नेपाली चलचित्र नगरीमा उदाएकी अभिनेत्री शर्माले अभिनयसँगै चलचित्र निर्माण समेत गरेकी छन् । अभिनेत्री शर्माले धेरै लभ स्टोरी चलचित्रहरूमा काम गरिसकेकी छन् । पहिलो पटक चलचित्र ‘दान्भी’मा पूजाको एक्सन देखिँदै छ । ‘दान्भी’अभिनेत्री शर्माको अभिनय करिअरमा १६ औँ चलचित्र हो । पूजाले यस चलचित्रबाट चलचित्र नगरीमा आफ्नो परिचय अझै बलियो बन्ने विश्वास गरेकी छन् । प्रस्तुत छ उनै अभिनेत्री शर्मासँग विशेष अनलाइनले गरेको विशेष गफ:
चलचित्र ‘दान्भी’कस्तो चलचित्र हो ?
‘दान्भी’ सन्देश मूलक भन्दा पनि पूर्णरुपमा मनोरञ्जनमूलक चलचित्र हो । ‘दान्भी’ हेर्दै गर्दा दर्शकले पक्कै पनि एउटा राम्रो चलचित्र हेरेको महसुस गर्नुहुने छ । ‘दान्भी’महिलाहरू पुरुष भन्दा कम छैनन् । जस्तो परिस्थिति आए पनि डटेर सामना गर्न सक्छन् भनेर देखाउन खोजिएको चलचित्र हो । चलचित्र एक्सनले भरिपूर्ण छ । एक्सन जनराको नेपाली चलचित्र नआएको धेरै नै भइसकेको छ । नेपाली दर्शकमा लागेको एक्सनको भोकलाई चलचित्र ‘दान्भी’ले मेट्नेमा पूर्ण आसावादी छु ।
तपाईँको भूमिकाका चैँ कस्तो छ ?
‘दान्भी’ मा नेपाली दर्शकले पूजा शर्मालाई फरक अवतारमा देख्दै छन् । दर्शकले लभ स्टोरीमा मात्र देखिरहनुभएको थियो । लभ स्टोरी त यसमा पनि नभएको हैन । लभ स्टोरीसँगै आफूलाई माया गर्ने मान्छेको लागि जस्तोसुकै परिस्थितिमा पनि पछि नहट्ने र लड्न सक्ने महिला पात्रका रुपमा पूजा शर्मालाई पाउनुहुने छ । यसबाट नेपाली दर्शकले मलाई फरक अवतारमा देख्दै हुनुहुन्छ । पूजाले जस्तो काम पनि गर्न सक्छे भन्न उदाहरणका लागि पनि ‘दान्भी’ महत्त्वपूर्ण छ ।
तपाईले एक्सन चलचित्र किन रोज्नु भयो ?
एक्सन चलचित्र मेरो रहर पनि हो । त्यससँगै एक्सन चलचित्र मैले ठुलै रिस्क मोलेर अभिनय गरेको हुँ। सधैँ एकै प्रकृतिको चलचित्र गर्नुभन्दा फरक पनि हुन्छ र सिक्ने मौका पनि पाइन्छ भनेर नै ‘दान्भी’मा काम गरेको हो । एक्सन के हो थाहा थिएन । ‘दान्भी’मा कम गरिरहँदा धेरै कुराहरू सिक्ने अवसर पाएँ । मैले रिस्क मोलेर काम गरेको चलचित्रलाई दर्शकले पक्कै रुचाउनु हुने छ भन्नेमा आसावादी छु ।
लभ स्टोरी र एक्सन दुवैमा अनुभव लिनुभयो, काम गर्न कुन सहज हुदो रहेछ ?
काम भन्ने कुरा दुवैमा सहज भन्ने त पक्कै हुँदैन तर, तुलनात्मक रूपमा लभ स्टोरीमा भन्दा एक्सन जनरामा काम गर्न निकै गाह्रो हुने रहेछ । अझ भनौँ अभिनयमा सबैभन्दा गाह्रो भनेको नै एक्नश हो । काम गर्न पनि उत्तिकै रिस्क छ । एउटा टेक बिग्रएर अर्को टेक लिनुपर्यो पनि निकै झन्जट हुने गर्छ । जे भए पनि हामीले दिनसक्ने शतप्रतिशत दिएका छौँ । हामीले परिक्षा दिएका छौँ अब रिजल्ट भैँ दर्शकको हातमा छ ।
नेपालमा एक्सन जनरामा पनि धेरै चलचित्र बनेका छन् । यसमा त्यस्तो के फरक महसुस गर्न पाउछन् नेपाली दर्शकले ?
एक्सन जनरामा काम गर्ने पक्कै पनि हामी पहिलो हैन । यो भन्दा अगाडी धेरै चलचित्र एक्सन जनरामा बनेका छन् । तर, चलचित्र ‘दान्भी’को एक्शनमा पहिलेका भन्दा धेरै फरक अनुभुति गर्न पाउनुहुने छ । कतिपय स्थानमा दर्शकले यो रिल नभएर रियल भइरहेको छ भन्ने अनुभूति गर्नुहुने छ । अरु बाँकी चै असार ७ लाई नै छाडिदिउ ।
चलचित्र ‘दान्भी’ले तापाईको कलाकारिता यात्रामा कस्तो स्थान निर्धारण गर्ला ?
यो चै दर्शकले गर्ने कुरा हो । मेरो मनमा पनि हरक्षण यही कुरा खेलिरहेको छ । म रातमा पनि राम्रोसँग निदाउन सकेको छैन । किनभने मैले आफ्नो काँधमा बोकेको चलचित्र हो ‘दान्भी’ । मेरो अभिनय करियरका लागि पनि यो चलचित्र एकदमै महत्त्वपूर्ण छ । आशा छ दर्शकले मेरो कामलाई उचित स्थान दिनुहुने छ ।
Discussion about this post