मनोज दाहाल । नवीन मेन्याङ्बो नेतृत्वको याक्थुङ चलचित्रकर्मी संघले चलचित्र ‘गाउँ आएको बाटो’ को एक शो सोल्ड आउट गरेको छ । धरानमा रहेको फ्रेन्ड्स सिनेमाको सनिवारको पहिलो शो याक्थुङ चलचित्रकर्मी संघले सोल्ड आउट गरेको हो ।
“निर्देशक नवीन सुब्बा आफैमा नेपाली चलचित्र नगरीको एउटा दरिलो खम्बा हो । त्यसमाथी चलचित्र ‘गाउँ आएको बाटो’ अन्तर्राष्ट्रिय स्तरमा प्रदर्शन भइसकेको छ । यसप्रकारका चलचित्रलाई हामीले सम्मान गर्नुपर्छ र यस्ता चलचित्रको सफलताको भागिदार हामी पनि हुनुपर्छ भन्ने उद्देश्यले चलचित्र हल नै रिजर्भ गरेर चलचित्र हेरिएको हो”, याक्थुङ चलचित्रकर्मी संघ केन्द्रिय अध्यक्ष नवीन मेन्याङ्बोले भने ।
शुक्रवारबाट प्रदर्शनमा आएको चलचित्रले देशैभर उत्कृष्ट सुरुवात गरेको छ । दुर्गम गाउँको आर्थिक विपन्न परिवारले आफ्नो सन्तान हुर्काउन गर्नुपरेको संघर्ष चलचित्र ‘गाउँ आएको बाटो’ को मुख्य कथावस्तु हो ।
‘हामी चाहान्छौ नेपाली चलचित्र क्षेत्रबाट राज्यकोषमा “आर्थिक आम्दानी होस् र राज्यले पनि कलाकारिता क्षेत्रलाई सम्मान गरोस् । राम्रा चलचित्रले उचित स्थान पाउनुपर्छ”, याक्थुङ चलचित्रकर्मी संघ केन्द्रिय अध्यक्ष मेन्याङ्बोले भने ।
अभिनेता दयाहाङ राईको अभिनय सबै चलचित्रमा एउटै हुन्छ भन्ने आरोप लागिरहेका बेला ‘गाउँ आएको बाटो’ को अभिनयले त्यो आरोपलाई समेत झुटो सावित गरेको अध्यक्ष मेन्याङ्बोको भनाई थियो ।
भोजपुर तथा धरानमा छायांकन भएको चलचित्रमा दयाहाङ राईका साथमा पशुपति राई, प्रेम सुब्बा तथा बालकलाकार प्रसन राईको मुख्य भुमिका रहेको छ ।
Discussion about this post