बिशेष अनलाइन । बहु प्रतिक्षित चलचित्र ‘महापुरुष’को प्रिमियर शो इटहरीमा गरिने भएको छ । चलचित्र प्रचार प्रसारका लागि मात्रै काठमाडौ भन्दा बाहिर चलचित्र निर्माण टिम आउने तर चलचित्रका अन्य सम्पूर्ण कार्यक्रमहरु काठमाडौ केन्द्रित हुने गरेकोमा चलचित्र ‘महापुरुष’को प्रिमियर इटहरीमा पनि गरिन लागेको हो ।
पहिलो प्रिमियर काठमाडौमा भइसकेको छ भने दोस्रो चितवन हुँदै इटहरीमा तेस्रो प्रिमियर आयोजना गर्न लागिएको हो । पहिलो प्रिमियर बाट सकारात्मक टिप्पणी पाएर उत्साहित रहेको ‘महापुरुष’ युनिटले तेस्रो प्रिमियर इटहरीमा गर्न लागेको हो ।
कार्तिक ९ गते हुन लागेको इटहरी प्रिमियरको संयोजन चलचित्र पत्रकार संघ सुनसरीले गरिरहेको छ । काठमाडौ केन्द्रित कार्यक्रमलाई चलचित्र पत्रकार संघ सुनसरीकै पहलमा इटहरीमा पनि गरिन लागेको हो । इटहरीको इलाइट सिनेमा हलमा आयोजना गरिने कार्यक्रममा चलचित्रका कार्यकारी निर्मार्ता तथा कलाकार रबिन्द्र सिंह बानियाँ, निर्देशक प्रदिप भट्टराई , अभिनेता उरुण क्षेत्री, अभिनेत्री अन्जना बराइली लगायतको उपस्थिति रहने छ ।
चलचित्रको ट्रेलरले दर्शको उत्कृष्ट प्रतिक्रिया पाएको छ । चलचित्रका निर्देशक तथा लेखक प्रदिप भट्टराईले हालसम्म निर्देशन गरेका चलचित्र मध्यको उत्कृष्ट चलचित्र बनेको बताएका छन् । चलचित्र कार्तिक ११ गते अर्थात भाइटिकाको भोलिपल्ट देखि देशै भर एकसाथ प्रदर्शनमा आउदै छ ।
Discussion about this post