विशेष अनलाइन। नयाँ वर्ष २०८३ को सुखद अवसर पारेर चलचित्र ‘जदौ’ को प्रदर्शन मिति घोषणा गरिएको छ। निर्माण पक्षले नयाँ डिजाइनका आकर्षक पोस्टरहरू सार्वजनिक गर्दै चलचित्र आगामी १२ भदौ मा देशभरका सिनेमा घरमा प्रदर्शन हुने जानकारी दिएको हो। सिल्भर स्क्रीन इन्टरटेन्मेन्टसँगको सहकार्यमा समिश्रण मुभिज एन्ड इन्टरटेन्मेन्टले यस चलचित्रलाई प्रस्तुत गरेको हो।
सार्वजनिक गरिएको नयाँ पोस्टरमा चलचित्रका मुख्य कलाकारहरू मुकुन भुसाल, ऋचा शर्मा, नीति शाह, प्रभात पाल ठकुरी र राजश्री थापालाई निकै भिन्न र प्रभावशाली अवतारमा देखाइएको छ। अन्जन शर्मा र काजी लिम्बुको संयुक्त निर्देशनमा तयार भएको यस चलचित्रले सुरुवाती प्रचारबाटै दर्शकमाझ उत्सुकता जगाउन सफल भएको छ।
विशेष गरी अन्तरजातीय प्रेमसम्बन्ध को गहिरो कथावस्तुमा आधारित भएर यो चलचित्र निर्माण गरिएको हो। चलचित्रको पटकथा स्वयं निर्देशक काजी लिम्बुले लेखेका हुन् भने श्याम तामाङले यसलाई क्यामेरामा कैद गरेका छन्। समाजको यथार्थपरक चित्रण र प्रेमको जटिलतालाई चलचित्रले पर्दामा उतार्ने अपेक्षा गरिएको छ।
यस चलचित्रमा उल्लेखित मुख्य कलाकारका साथै सिपी पुडासैनी ‘धतुरे’, विनोद न्यौपाने, सन्ध्या श्रेष्ठ, खड्गबहादुर पुन, विशाल पहाडी, सुन्दर धिताल र नरेश पौडेल लगायतको अभिनय देख्न पाइनेछ। रामजी लामिछानेको नृत्य निर्देशन रहेको यस चलचित्रका गीतहरूमा लोकप्रिय संगीतकार अर्जुन पोखरेल र बाबुल गिरीले संगीत भरेका छन्।
रामराजा सुवेदी, सुमित्रा देवकोटा, नारायण शास्त्री, अर्जुन खड्का र गोकुल केसी सह-निर्माता रहेको यस चलचित्रको प्रचार प्रसारलाई अब तीव्रता दिइने निर्माण टोलीले जनाएको छ।
Discussion about this post