विशेष अनलाइन। नेपाली चलचित्र इतिहासकै सर्वाधिक सफल चलचित्र ‘पूर्ण बहादुरको सारङ्गी’का निर्माता विनोद पौडेल अब निर्देशकको भूमिकामा देखिने भएका छन्। नयाँ वर्ष २०८३ को अवसर पारेर उनले आफ्नो डेब्यु निर्देशकीय चलचित्र ‘दुई किनारा’ निर्माणको औपचारिक घोषणा गरेका हुन्। यसअघि तीनवटा चलचित्रमा लगानी गरिसकेका पौडेलले चौथो प्रोजेक्टमार्फत निर्देशनको कमान्ड सम्हाल्न लागेका हुन्।
निर्माण पक्षले यो चलचित्रलाई ठीक एक वर्षपछि अर्थात् वि.सं. २०८४ साल वैशाख १ गते प्रदर्शनमा ल्याउने लक्ष्यसहित रिलिज मिति तय गरेको छ। यद्यपि, चलचित्रमा अभिनय गर्ने कलाकार र अन्य प्राविधिक टोलीको बारेमा भने अहिले कुनै पनि आधिकारिक जानकारी सार्वजनिक गरिएको छैन।
ऐतिहासिक रेकर्ड राख्न सफल ‘पूर्ण बहादुरको सारङ्गी’ बाट सफल निर्माताका रूपमा स्थापित भएका विनोदले त्यसपछि ‘अभिमन्यु’ निर्माण गरेका थिए। उनको निर्माणमा बनेको अर्को चलचित्र ‘रोल नं १’ यतिबेला प्रदर्शनको पर्खाइमा छ। निर्माण क्षेत्रको लामो अनुभवपछि उनले ‘दुई किनारा’ मार्फत पहिलोपटक निर्देशनमा हात हालेका हुन्।
Discussion about this post