विशेष अनलाइन । सुर्खेतकी १६ वर्षीया किशोरी इनिशा विकको दुखद मृत्यु प्रकरणले अहिले देशभरका सर्वसाधारणदेखि सेलिब्रेटीसम्मलाई स्तब्ध बनाएको छ। सामाजिक सञ्जालमा यस घटनालाई लिएर तीव्र आक्रोश व्यक्त भइरहेको छ भने दोषीलाई कडाभन्दा कडा कारबाहीको दायरामा ल्याउनुपर्ने माग चौतर्फी रूपमा उठेको छ। यही सन्दर्भमा सामाजिक विषयवस्तुमा स्पष्ट धारणा राख्ने अभिनेत्री सुरक्षा पन्तको एउटा पोस्ट अहिले सामाजिक सञ्जालमा भाइरल भइरहेको छ।
अभिनेत्री पन्तले बलात्कार र हत्याजस्ता जघन्य अपराधको मूल जडका बारेमा पुरुष पात्रहरूलाई गम्भीर प्रश्न गरेकी छन्। उनले लेखेकी छन्, “प्रिय पुरुष पात्र, केवल एक प्रश्नको उत्तर दिनुभए आभारी हुने थिएँ। बलात्कार–हत्याको यस्तो जघन्य अपराधको जड के हो? सत्य बोल्नुहोला।” उनले छोरीहरूलाई यसको उत्तर थाहा भए तापनि समाजको उकुसमुकुसलाई सम्बोधन गर्नु पुरुषहरूको पनि धर्म भएको उल्लेख गरेकी छन्।
आफ्नो टिप्पणीको अन्त्यमा उनले ‘मौन’, ‘बलात्कारमुक्त’ र ‘समाज’ जस्ता नेपाली ह्यासट्यागहरू प्रयोग गर्दै न्यायको आवाज बुलन्द पारेकी छन्। सुरक्षा पन्त चलचित्र क्षेत्रमा केवल अभिनयका लागि मात्र नभई समसामयिक र सामाजिक मुद्दाहरूमा आफ्नो तार्किक विचार राख्नका लागि पनि चिनिन्छिन्। उनको यो प्रश्नले अहिले सामाजिक सञ्जालमा ठूलो बहस सिर्जना गरेको छ।
इनिशा विकको हत्या प्रकरणमा चलचित्र, संगीत, टेलिभिजन, कन्टेन्ट क्रिएटरदेखि ब्युटी पेजेन्टका व्यक्तित्वहरूले पनि आ–आफ्नो धारणा सार्वजनिक गरिरहेका छन्। कला क्षेत्रका यी हस्तीहरूले घटनाप्रति गहिरो दुःख व्यक्त गर्दै पीडित परिवारलाई न्याय दिन र अपराधीलाई उन्मुक्ति नदिन सरकारसँग माग गरेका छन्।
यो घटनाले नेपाली समाजमा महिला सुरक्षाको विषयलाई पुनः एकपटक गम्भीर बहसको केन्द्रमा ल्याएको छ। सुरक्षा पन्त लगायतका अन्य कलाकारहरूको ऐक्यबद्धताले न्यायको खोजीमा थप दबाब सिर्जना गरेको देखिन्छ।
Discussion about this post