विशेष अनलाइन । बहुप्रतिक्षित चलचित्र ‘राम नाम सत्य’ को आधिकारिक टिजर भिडियो युट्युबमार्फत सार्वजनिक गरिएको छ। एक्सन, सस्पेन्स, प्रेम र थ्रिलर जस्ता विविध तत्वहरू समेटिएको यो चलचित्रले दर्शकमाझ निकै उत्सुकता जगाएको छ। माइकल चन्दको निर्देशनमा तयार भएको यस चलचित्रको टिजरमा मुख्य अभिनेता विराज भट्टलाई यसअघि नदेखिएको शक्तिशाली एक्सन अवतारमा प्रस्तुत गरिएको छ।
यो चलचित्रलाई विशेष गरी वरिष्ठ अभिनेता स्वर्गीय सुनिल थापाप्रति पूर्ण रूपमा समर्पित गरिएको छ। चलचित्रको क्लाइमेक्स दृश्य छायांकन भइरहेकै समयमा अभिनेता थापाको असामयिक निधन भएको थियो। सोही कारण निर्माण पक्षले टिजरमार्फत पनि उहाँलाई विशेष श्रद्धाञ्जली अर्पण गर्दै यो चलचित्र उहाँको योगदानको सम्मान स्वरूप तयार भएको जनाएको छ।
माइकल इन्टरटेन्मेन्टको ब्यानरमा निर्माण भएको यस चलचित्रमा कलाकारहरूको जम्बो टोली देख्न सकिन्छ। चलचित्रमा विराज भट्टका साथै सुशील श्रेष्ठ, दिव्या रायमाझी, सुपुष्पा भट्ट, आयुषसिंह ठकुरी, सुनिल थापा, प्रशान्त ताम्राकार र खुशी कार्की लगायतका कलाकारहरूको सशक्त अभिनय रहेको छ। चलचित्रमा समावेश ‘धागोले बाटेको’ बोलको गीत पहिले नै सुपरहिट भइसकेकाले पनि चलचित्रप्रति दर्शकको अपेक्षा उच्च रहेको छ।
प्राविधिक पक्षतर्फ उपेन्द्र शाही र स्वेता बिमलीको लगानी रहेको यस चलचित्रका कार्यकारी निर्माताहरू किशोर भट्ट, राजेन्द्र भट्ट र अर्जुन सुनार हुन् भने मोती कार्की क्रियटिम निर्माताका रूपमा रहेका छन्। चलचित्रमा मानकृष्ण महर्जनको छायांकन, श्री श्रेष्ठको द्वन्द्व निर्देशन, बन्दे प्रसादको सम्पादन र काला चरणको पार्श्व ध्वनि समावेश छ। संगीततर्फ बाबुल गिरी, अर्जुन पोखरेल, एसडी योगी र नवाज अन्सारीले काम गरेका छन्।
निर्देशक माइकल चन्दकै कथा र पटकथा रहेको यस चलचित्रका लागि अभिमन्यू निरवी र समय थपलियाले स्क्रिप्ट सल्लाहकारको भूमिका निभाएका छन्। टिजर र ट्रेलरको सम्पादन साहिल खानले तयार पारेका हुन्। उत्कृष्ट प्राविधिक कार्य र कलाकारहरूको समिश्रण रहेको यो चलचित्र आगामी २७ चैतदेखि देशभरका सिनेमा हलहरूमा प्रदर्शन हुने तयारीमा रहेको छ।
Discussion about this post