‘मोहर’ चलचित्रको भावुक गीत ‘सपना हो कि विपना हो कि जिन्दगी’ सार्वजनिक

विशेष अनलाइन । नेपाली चलचित्र ‘मोहर’ को नयाँ गीत ‘सपना हो कि विपना हो कि जिन्दगी’ सार्वजनिक भएको छ । साउन २३ गतेदेखि देशभर प्रदर्शनमा आउन लागेको यस चलचित्रको उक्त गीतमा थानेश्वर गौतम र शान्ती श्री परियारको स्वर रहेको छ भने शब्द प्रभा बर्तौलाले लेखेकी हुन् । गीतमा थानेश्वर गौतमकै संगीत समावेश छ, जसले पात्रहरूको भावनात्मक यात्रा र कथामा रहेको वियोगान्त पक्षलाई उजागर गर्छ ।

‘मोहर’ लाई ओम प्रतिकले लेखन तथा निर्देशन गरेका छन् । निर्माता चुम्बन जंग शाही रहेका फिल्ममा बहुप्रतिष्ठित कलाकारहरूको सहभागिता रहेको छ । चलचित्रमा पल शाह, अर्जुन जंग शाही, बेनिशा हमाल, नीति शाह, मिथिला शर्मा, रविन्द्र झा, लक्ष्मी गिरी, मिस पबी, सुशील देवकोटा, लक्ष्मीनाथ तिमिल्सिना, सिद्धार्थ सिंह, दत्त पण्डित, गीता थापा, नविन खतिवडा, अर्जुन आचार्य लगायतले अभिनय गरेका छन् । बालकलाकार सारा शर्माले पनि अभिनय मार्फत दर्शकको मन जित्ने प्रयास गरेकी छन् ।

चलचित्र मेकर्स प्रा.लि. को ब्यानरमा बनेको चलचित्रको छायांकन दीपेन बस्न्यातले गरेका हुन् भने सम्पादनको जिम्मा भूपेन्द्र अधिकारीले सम्हालेका छन् । संगीतमा सुरेश अधिकारी, थानेश्वर गौतम र एसडी योगीको टिमले काम गरेको छ । दृश्य प्रभाव (VFX) समीर मियाको रहेको चलचित्रमा कुमार महर्जनले एक्सन निर्देशन गरेका छन् । कोरियोग्राफीको जिम्मा रामजी लामिछाने र कविराज गहतराजले सम्हालेका छन् भने गिरिराज घिमिरे मुख्य सहायक निर्देशकको भूमिकामा छन् ।

यसअघि सार्वजनिक भएको ट्रेलर र दुई गीतले नै दर्शकमाझ राम्रो चर्चा कमाइसकेको चलचित्र ‘मोहर’ले साउन २३ गतेको रिलिजपछि नेपाली सिनेमा बजारमा नयाँ ऊर्जा ल्याउने अपेक्षा गरिएको छ ।