विशेष अनलाइन । जोन राईको लेखन तथा निर्देशनमा बनेको चलचित्र ‘बम बहादुर’ को पुर्वको सहर इटहरिमा पत्रकार भेटगाट कार्यक्रम सम्पन्न भएको छ । कार्यक्रममा चलचित्रका निर्माता सञ्जीव सार्की, निर्देशक जोन राई, प्रमुख अभिनेता सौगात मल्ल, अभिनेत्रीहरु अनिशा रसाइली, शान्तिला तामाङ लगायतको उपस्थिति रहेको थियो । सुनसरीको इटहरी र धरानसंगै मोरङको बिराटनगर तथा सुन्दरहरैँचाका सक्रिय पत्रकारहरुसहित झापा र काठमाडौ तथा दार्जीलिङका पत्रकारहरुको उपस्थिति बाक्लो रहेको थियो ।
कार्यक्रममा अभिनेता सौगात मल्लले चलचित्रको कथा आफ्नै जस्तो लागेको र यसले दर्शकको मन जित्ने विश्वास व्यक्त गरे । ‘स्क्रिप्ट पढ्दा मलाई आफ्नै कथा जस्तो महसुस भएको थियो । म निकै भावुक भएको थिएँ र तुरुन्तै मैले यो कथामा काम गर्छु भनेर सोच्न खासै समय लगाइन’, मल्लले भने ‘नेपालमा बस्ने जतिले पनि यो चलचित्र हेर्नु हुन्छ यो कथा आफ्नै हो जस्तो लाग्छ ।’
चलचित्रकी नायिका अनिशा रसाइलीले यो चलचित्रले सबैको एउटै कथा हो भन्ने पक्षलाई उजागर गर्ने बताइन् । ‘म सिक्किमको भएकोले मलाई त्यति धेरै आइडिया थिएन, जब म यो फिल्म सुट गर्न थालेँ, त्यो लोकेसनमा पुरानो समयमा समस्या भोग्नु भएकाहरूको कुरा सुन्दा डरलाग्दो थियो’, उनले थपिन् ‘मेरो अनुरोध छ कि यो फिल्म जरुर हेर्दिनुस् र त्यो पीडालाई महसुस गर्नुस् ।’
लेखक तथा निर्देशक राईले चलचित्र बनाउनुको उद्देश्य आफ्नो इतिहास नबिर्सौँ भन्ने रहेको बताए । उनले भने , ‘चलचित्रको अर्को उद्देश्य भनेको अब गोर्खाल्याण्ड जस्तो आन्दोलन नहोस् । विभिन्न प्रकारको शिक्षित समाज बनोस् तथा खुकुरी र बन्दुकले होइन दिमागले आन्दोलन गरौँ भन्ने हो । सन् १९८६ मा दार्जिलिङमा भएको गोर्खाल्यान्ड आन्दोलनको पृष्ठभूमिमा मानव जीवनका आरोह–अवरोहहरूलाई पर्दामा उतारेको छु ।भारतका नेपाली, विशेष गरी दार्जिलिङ पहाड र छिमेकी क्षेत्र डुअर्समा बसोबास गर्ने नेपाली समुदायको सङ्घर्षहरूलाई मार्मिक ढङ्गले चलचित्रमा उठाएका छौ ।’
चलचित्रमा सौगात मल्ल, प्रशान्त राई, अनिशा रसाइली, भास्कर प्रधान, महेन्द्र बग्दास लगायतका कलाकारहरूको मुख्य अभिनय रहेको छ । यो चलचित्रको कथा तथा स्क्रीनप्ले जोन राई र रुपेश तामाङले तयार गरेका हुन् ।
Discussion about this post