अञ्जिला’को प्रदर्शन मिति हेर्फेर ,माघ ११ बाट फागुन २९ मा पुग्यो प्रदर्शन मिति

विशेष अनलाइन । मिलन चाम्स निर्देशित चलचित्र ‘अञ्जिला’को प्रदर्शन मिति हेर्फेर भएको छ । माघ ११ गते बाट प्रदर्शनमा ल्याउने भनेको चलचित्रको प्रदर्शन मिति अब फागुन २९ गते प्रदर्शन गर्ने भएको छ।

चलचित्रको सबै कुराहरू मिलाउने क्रममा रिलिज मिति सार्नुपरेको निर्देशक चाम्सले बताएका छन्। महिला राष्ट्रिय फुटबल टिमकी गोलरक्षक एञ्जिला तुम्बाफे सुब्बाको जीवनमा आधारित चलचित्रमा दयाहाङ राई, सिर्जना सुब्बा, माओत्से गुरुङ, बुद्धि तामाङ लगायत कलाकारहरूको अभिनय रहेको छ । चलचित्रमा एञ्जिला स्वयं मुख्य भूमिकामा देखिने छिन् । निर्माता प्रेम कुमार श्रेष्ठले पनि चलचित्रमा प्रमुख भूमिका निर्वाह गरेका छन्।

एञ्जिलाको जन्मथलो इलामको आइतबारे, झापा, र काठमाडौँमा चलचित्रको छायाङ्कन गरिएको छ। निर्देशक चाम्सले यो चलचित्रले फरक प्रकारको छाप छोड्ने दाबी गरेका छन् । चलचित्र एञ्जिलाको बाल्यकालदेखि खेल जीवनसम्मको सङ्घर्ष र सफलताको कथामा आधारित रहेको छ । इच्छाशक्ति भए असम्भव केही छैन भन्ने सन्देश यस चलचित्रले दिने प्रयास गरेको छ। यद्यपि, यो चलचित्र ठ्याक्कै एञ्जिलाको बायोपिक भने नभएको निर्देशकले स्पष्ट पारेका छन्।

चलचित्रको डिओपी सुदीप बराल र सम्पादन मिलन श्रेष्ठको रहेको छ। मुन लभ इन्टरटेन्मेन्टको ब्यानरमा प्रेम श्रेष्ठले निर्माण गरेका हुन्। विनोद अग्रवाल र राजेश बगडिया सह-निर्माता हुन्। विनोद सुवेदी खत्री निर्माण नियन्त्रक हुन्।