धुर्मुस सुन्तलीको ‘म त मर्छु कि क्या हो’ अब युट्युबमा

विशेष अनलाइन । हास्य कलाकारद्वय सिताराम कट्टेल (धुर्मुस) र कुन्जना घिमिरे (सुन्तली)ले निर्माण गरेको वेब चलचित्र ‘म त मर्छु कि क्या हो’ युट्युबमा सार्वजनिक गरिने भएको छ । ‘म त मर्छु कि क्या हो’ आज (सोमवार) ३ बजेर १५ मिनेट जादा धुर्मुस सुन्तली युट्युब च्यानलमा हेर्न सकिने सिताराम कट्टेल (धुर्मुस)ले जानकारी दिएका छन् ।

चितवनका विभिन्न स्थानहरुमा छायांकन गरिएको यो चलचित्र ओटिटी प्लेटफर्म ओहो मुभिजमा राखिएको थियो । चलचित्रमा सिताराम कट्टेललाई धुर्मुस र कुञ्जना घिमिरेलाई सुन्तलीकै भूमिकामा देख्न पाइने भएका कारण पनि यो चलचित्रले एक सम निकै चर्चा बटुल्न सफल हास्य टेलिश्रिंखला मेरीवास्सैको झझल्को दिने छ । करिब २ घन्टा समय अवधीको यो चलचित्र नितान्त दर्शकको मनोरञ्जनको लागि तयार पारिएको सिताराम कट्टेल (धुर्मुस)ले जानकारी दिएका छन् ।

चलचित्रमा धुर्मुस र सुन्तलीसँगै रवि गिरी, बुद्धि तामाङ, विजय बराल, पल्पसा डंगोल, बलदिप राई, सुमन कार्की, सुमन कोइराला, प्रमिला खनाल, घनश्याम गौतम, सुनिता घिमिरे, पुष्पा आचार्य र सुशीला थापाको अभिनय रहेको छ । चलचित्रको लेखन तथा निर्देशन धुर्मुस र सुन्तली दुवैले गरेका हुन् । सुदिप बरालको छायाङ्कन रहेको चलचित्रको सम्पादन मिलन श्रेष्ठले गरेका हुन् ।