विशेष अनलाइन । फागुन २९ गतेदेखि प्रदर्शनमा आएको नेपाली चलचित्र अन्जिला को प्रचारप्रसार अभियानअन्तर्गत फिल्म युनिटले पूर्वी नेपाल भ्रमण सम्पन्न गरेको छ। नेपाली महिला राष्ट्रिय फुटबल टिमकी कप्तान तथा गोलरक्षक एन्जिला तुम्बाप्पो सुब्बाको जीवनीमा आधारित यो चलचित्रलाई दर्शकबाट सकारात्मक प्रतिक्रिया प्राप्त भइरहेको छ।
चलचित्रको मुख्य पात्र तथा स्वयं एन्जिला तुम्बाप्पो सुब्बासहित निर्देशक मिलन चाम्स, निर्माता प्रेम कुमार श्रेष्ठ, कार्यकारी निर्माता बिनोद अग्रवाल, निर्माता ज्योतिराज राई लगायतको टोली पूर्वी नेपाल पुगेको हो। काठमाडौंमा दर्शक भेटघाट कार्यक्रम आयोजना गर्ने योजना भए पनि उपत्यकामा चलेको आन्दोलनका कारण कार्यक्रम प्रभावित भएपछि टोली पूर्व लाग्न बाध्य भयो।
पूर्व भ्रमणअन्तर्गत टोलीले इटहरीको इलाइट सिनेमा तथा धरानको फ्रेन्ड्स सिनेमामा दर्शकसँग अन्तरक्रिया गर्यो। धरानमा चलिरहेको गोधुली कप मा समेत उपस्थित भएर टोलीले चलचित्रको प्रवर्द्धन गर्यो। त्यस्तै, दमकको डिम्याक्स हल र बिर्तामोडको क्यूएफएक्स सिनेमा तथा पाथीभरा हल का दर्शकसँग भेटघाट गरियो। दमक र बिर्तामोडमा चलचित्र युनिटलाई भव्य स्वागत गरियो, जहाँ परम्परागत बाजागाजा र सांस्कृतिक नृत्य प्रस्तुत गरियो।
चलचित्र हेरेका दर्शकहरू पर्दामा देखिएकी एन्जिलालाई प्रत्यक्ष भेट्दा निकै उत्साहित देखिए। चलचित्रको प्रेरणादायी कथावस्तु, कलाकारहरूको सशक्त अभिनय, र निर्देशकको उत्कृष्ट प्रस्तुतीकरणले दर्शकको मन जितिरहेको छ। विशेष गरी पूर्वी नेपालका दर्शकहरूले चलचित्रलाई अत्यधिक रुचाइरहेको निर्माण पक्षले जनाएको छ।
अन्जिला नेपाली खेलकुद क्षेत्रमा योगदान पुर्याएकी एक प्रतिभाशाली खेलाडीको प्रेरणादायी कथामा आधारित बायोपिक हो। चलचित्रमा स्वयं एन्जिला तुम्बाप्पो सुब्बाले अभिनय गरेकी छन्, जसले दर्शकका लागि थप रोचकता बढाएको छ।
चलचित्रमा दयाहाङ राई, सृजना सुब्बा, माओत्से गुरुङ, विजय बराल, बुद्धि तामाङ, तथा निर्माता प्रेम कुमार श्रेष्ठ समेत विभिन्न भूमिकामा देखिएका छन्। निर्देशक मिलन चाम्सले चलचित्रलाई यथार्थपरक रूपमा प्रस्तुत गर्न सफल भएका छन्।
फागुन २९ गतेदेखि प्रदर्शनमा आएको चलचित्रले हालसम्म सानदार व्यापार गरिरहेको छ। विशेषगरी पूर्वी नेपालका दर्शकहरूले चलचित्रलाई निकै मन पराएका छन्। चलचित्र युनिटले देशका अन्य भागहरूमा पनि प्रचार अभियान तीव्र बनाउने योजना बनाएको छ।
नेपाली चलचित्र क्षेत्रमा नयाँ प्रयोगका रूपमा आएको अन्जिला ले दर्शकको मन जितिरहेको छ। नेपाली खेलकुदको वास्तविक संघर्ष र सफलताको कथालाई सशक्त रूपमा प्रस्तुत गरेको यो चलचित्र आगामी दिनमा अझ व्यापक रूपमा सफल हुने अपेक्षा गरिएको छ।
Discussion about this post