विशेष अनलाइन । चलचित्र ‘एक्लो’ले नयाँ पोस्टर सार्वजनिक गरेको छ । पोस्टरमा कलाकार सुरजसिंह ठकुरीको चरित्र प्रस्तुत गरिएको छ ।
तस्वीर हेर्दा उनले ‘काल’ नामक पात्रको भूमिका निर्वाह गरेका छन् । मेकअप, हेयर स्टाइल र पोस्टरले उनको पात्रलाई निकै रोचक बनाएको छ । पोस्टरले ठकुरी खलपात्रको चरित्रमा देखिने बुझ्न सकिन्छ ।
‘एक्लो’ प्रदीप शाहीको निर्देशनमा बन्न लागेको तेस्रो चलचित्र हो । हाल चलचित्रको सम्पादन भइरहेको छ । पोस्ट-प्रोडक्सन सकिएपछि प्रदर्शन मिति तय गरिने बताइएको छ ।
चलचित्रमा प्रदीप खड्का, विजय लामा, सुनिल थापा, दीया पुन, बेनिशा हमाल, दिनेश डीसी, कविता नेपाली लगायतको अभिनय छ । चलचित्रमा बेलायती कलाकार जेमी बेकन पनि महत्वपूर्ण भुमिकामा छन् ।
चलचित्रले एक प्रकारको खतरनाक भाइरसले सन् २०३० सम्म मानिसले पृथ्वी ग्रह छाड्ने भविष्यको काल्पनिक कथा प्रस्तुत गरेको छ । त्यसको ६० वर्षपछि बेलायती अन्तरीक्षयात्री ज्याक (बेकन) आफ्ना साझेदारसँग हिमालय क्षेत्रमा क्रास-ल्यान्डिङ गर्छन् ।
तिनीहरूले आफ्नो वरपरको खोजी गर्छन् र पहाड बीचमा रहेको गुफाभित्र लुकेको शहर पत्ता लगाउँछन्, जहाँ तिनीहरूले एक रहस्यमय व्यक्तित्व (प्रदीप खड्का)लाई भेट्छन्, जो हिमालय क्षेत्रको पौराणिक संरक्षक हो । निर्मातामा राजुकुमार गुरुङ, हरि श्रेष्ठ, विष्णु तामाङ, उत्सव विष्ट, भाइराजा थापा, नवीन सिवा, बागवीर पुन छन् ।
Discussion about this post