विशेष अनलाइन । निर्माता ज्योतिराज राईको ब्यानरमा निर्माण भएको चलचित्र ‘लुङ्गा’ शुक्रवारबाट अलनेपाल प्रदर्शनमा आयो । चलचित्रले औषत व्यापार गरेको छ । चलचित्रलाई धरानमा मिश्रित प्रतिकृया मिलेको छ । धरानमा चलचित्र हेरेर निस्किएका अधिकांश दर्शकले चलचित्रको प्रसंशा गरे । केही दर्शकले भने चलचित्रले उठान गरेको विषयवस्तु र नाम मेल नखाएको उल्लेख गरे । चलचित्रको नाम ‘लुङ्गा’ भएको भए पनि चलचित्रले नाम अनुसारको कथा प्रस्तुत नगरेको दर्शकको प्रतिकृया थियो ।
लिम्बू कल्चरमा बनेको चलचित्र भनिए पनि लिम्बु समुदायको युवा युवतिविचको प्रेम र प्रेमका कारण भोग्नुपरेको पिडा तथा खुशीलाई चलचित्रले प्रस्तुत गर्न खोजेको देखिन्छ । धरानको चलचित्र प्रदर्शनमा संयोजन गरेका याक्थुङ चलचित्रकर्मी संघका केन्द्रिय अध्यक्ष नविन मेन्याङ्बोले चलचित्र उत्कृष्ट बनेको उल्लेख गरे ।
पत्रकार महासंघ केन्द्रिय सदस्य तथा नेपाली चलचित्र पुरानो बुलेटका निर्देशक भिषण राईले चलचित्रको पहिलो भागको तुलनामा दोश्रो भाग उत्कृष्ट रहेको उल्लेख गरे । राइले छायांकनमा भने केही कमजोरी देखिएको बताए । यता चलचित्रकर्मी महासंघ प्रदेश १ का कार्यसमिति सदस्य रितेशजंग खत्रीले चलचित्रको खुलेर प्रसंशा गरे । उनले नेपालमा बनेका उत्कृष्ट चलचित्रहरु मध्यको एक ‘लुङ्गा’ पनि रहेको उल्लेख गरे ।
चलचित्र हेरेपछि सटिक प्रतिकृया दिदै पुर्वाञ्चल इन्टिच्युट अफ फिल्म एण्ड टेलिभिजनका प्रमुख रोनिश राउतले चलचित्रको कथावस्तु अनुसार चलचित्र बन्न नसकेको उल्लेख गरे । ”यही कथावस्तुमा यो भन्दा निकै उत्कृष्ट चलचित्र निर्माण गर्न सकिन्थ्यो ।” पहिलो हापमा चलचित्रले गमाएको लयलाई दोश्रो हापबाट भने लय फर्काउन सफल भएको राउतको भनाई थियो ।
पुर्वी नेपालको पहाडी भेगमा बसोवास गर्ने लिम्बु समुदायका युवा युवतीहरुको प्रेम कथालाई मुख्य विषयवस्तु बनाएर चलचित्र निर्माण गरिएको छ । किरण राईको निर्देशनमा बनेको चलचित्रमा निर्माता सन्जिब राई,प्रयास घिमिरे कार्यकारी निर्माता र शान्ता पौडेल, मनिशा पाठक, मेनुका घिमिरे, कैलाश राई र टि आर साम्सोहाङसह निर्माता रहेका छन्। चलचित्रमा बुद्धि तामाङ,भुवन सिंह राई,सारा लोहोरुङ राई,भिम शर्मा लिम्बू,प्रकाश दाहाल,अनुप लिङ्खिम,सुदिप जंग कार्की,गङ्गा बहादुर राई,सम्झना लिम्बू,रमेश बुढाथोकी,निशान लुइँटेल,स्मृति पोखरेल, सलिना गुरुङ लगायतका कलाकारहरुको अभिनय रहेको छ। भलचित्रमा किरण राईको छायांकन तथा सम्पादन रहेको छ ।
Discussion about this post