विशेष अनलाइन । अभिनेत्री वर्षा राउतले आफ्नो आधिकारिक टिकटक खातामा पोस्ट गरेको एक भिडियो यतिबेला सामाजिक सञ्जालमा चर्चाको विषय बनेको छ। उक्त भिडियोमा उनले गला अवरुद्ध पार्दै र गहभरि आँसु लिएर आफ्नो पछिल्लो चलचित्र ‘मालती मंगले’ लाई चलचित्र क्षेत्रका सहकर्मीहरूले साथ नदिएको भन्दै गुनासो पोखेकी छन्। आफूले सधैं अरूका चलचित्रलाई प्रत्यक्ष वा अप्रत्यक्ष रूपमा सहयोग गर्दै आए पनि आफ्नै बेलामा कसैले वास्ता नगरेको भन्दै उनले चित्त दुखाएकी हुन्। यो भिडियो हालसम्म १० लाखभन्दा बढी पटक हेरिएको छ।
वर्षाको यो भावुक अभिव्यक्ति सार्वजनिक भएपछि भने चलचित्र क्षेत्रका अन्य अभिनेत्रीहरू उनको समर्थनमा जुटेका छन्। बुधबार बिहान अभिनेत्री तथा मोडल गरिमा शर्माले फेसबुकमार्फत ‘मालती मंगले’ एकपटक हेर्नैपर्ने चलचित्र बनेको उल्लेख गरेकी छन्। उनले वर्षा राउत, विजय बराल र मेक्सम गौडेलको अभिनयको मुक्तकण्ठले प्रशंसा गर्दै गायक रामकृष्ण ढकालको पहिलो निर्माण भए पनि चलचित्रमा कुनै खोट लगाउने ठाउँ नभएको र यसले मनमा छुट्टै छाप छोडेको बताएकी छन्।
गरिमाको समर्थन लगत्तै अभिनेत्री केकी अधिकारीले पनि सामाजिक सञ्जालमार्फत यो चलचित्र हेर्न दर्शकहरूलाई आग्रह गरेकी छन्। उनले चलचित्रको ट्रेलर साझा गर्दै रामकृष्ण ढकालद्वारा निर्मित तथा वर्षा, विजय र मेक्सम अभिनीत यो सुन्दर चलचित्र नजिकैको हलमा गएर हेर्न सुझाव दिएकी छन्। वर्षाको आँसुले काम गरे झैँ, बिस्तारै चलचित्रकर्मीहरू बीच यो चलचित्रका लागि सकारात्मक माहोल बन्न थालेको देखिएको छ।
प्रख्यात गायक रामकृष्ण ढकालको निर्माणमा बनेको यस चलचित्रमा वर्षाले एक ग्रामीण महिलाको भूमिका निर्वाह गरेकी छन्। दर्शक र समीक्षकहरूले उनको अभिनयलाई अहिलेसम्मकै उत्कृष्ट भन्दै प्रशंसा गरिरहेका छन्। यद्यपि, अभिनयको कदर भए पनि चलचित्रले बक्स अफिसमा भने सोचेजस्तो व्यापारिक सफलता हात पार्न सकिरहेको छैन। व्यावसायिक रूपमा केही कमजोर देखिए पनि कलाकारहरूको अभिनय र कथावस्तुले भने सकारात्मक प्रतिक्रिया पाइरहेको छ।
Discussion about this post