विशेष अनलाइन । चन्द्र पन्तको निर्देशनमा निर्माण हुन लागेको नयाँ चलचित्र ‘आबाट आमा २’ को शुभ मुहूर्त गरिएको छ। सोमबार बिहान पाटनस्थित बङ्गलामुखी मन्दिरमा चलचित्रका मुख्य कलाकार र प्राविधिक टोलीको उपस्थितिमा धार्मिक विधिअनुसार चलचित्रको सफलताको कामना गर्दै मुहूर्त सम्पन्न गरिएको हो। यो चलचित्र अघिल्लो सुपरहिट चलचित्र ‘आबाट आमा’ को सिक्वेलको रूपमा निर्माण हुन लागेको हो।
विशेष गरी यो चलचित्रमा नेपाली चलचित्र क्षेत्रकी चर्चित अभिनेत्री विपना थापा र लोकप्रिय अभिनेता पल शाहको मुख्य भूमिका रहनेछ। उनीहरूसँगै भारतीय कलाकार प्रदीप रावत, गजित विष्ट, आकाश श्रेष्ठ र नरेन खड्का लगायतका कलाकारहरूको सशक्त अभिनय रहने जानकारी दिइएको छ। अनुभवी र युवा कलाकारहरूको यो मिश्रणले चलचित्रलाई थप प्रतिक्षित बनाएको छ।
निर्देशक चन्द्र पन्तले चलचित्रको छायाङ्कनका लागि सम्पूर्ण तयारी भइरहेको र केही दिनभित्रै छायाङ्कनको अन्तिम समय तालिका (सेड्युल) सार्वजनिक गर्ने बताउनुभएको छ। निर्माण टोलीले करिब एक महिना अघि नै यो चलचित्रलाई आगामी दशैँको अवसर पारेर प्रदर्शनमा ल्याउने घोषणा गरिसकेको छ, जसका कारण पनि निर्माण कार्यलाई तीव्रता दिइएको छ।
आर्या इन्टरटेन्टमेन्ट प्रालिको ब्यानरमा निर्माण हुन लागेको यस चलचित्रको कथा र पटकथा स्वयं निर्देशक पन्तले नै तयार पार्नुभएको हो। चलचित्रको वितरणको जिम्मा आरआर फिल्मसले लिएको छ भने यसको डिजिटल अधिकार ओएसआर डिजिटलले प्राप्त गरेको छ।
Discussion about this post