विशेष अनलाइन । समाजमा बढ्दो रक्सीको कुलत र यसले निम्त्याउने पारिवारिक समस्यालाई चित्रण गरिएको नयाँ थारु म्युजिक भिडियो ‘एक बोतल दारु, दुई बोतल दारु’ सार्वजनिक भएको छ। सुनसरीको झुम्कास्थित म्याजिक सिनेमा हलमा सोमबार एक विशेष समारोहका बीच यसको विमोचन गरियो। सोही अवसरमा स्वर्गीय गायक राम धामीप्रति श्रद्धाञ्जली समेत अर्पण गरिएको थियो। यो भिडियो गायक प्रवलदीप विश्वासको आधिकारिक युट्युब च्यानलबाट गरिएको हो।
थारु चलचित्र उद्योगका पहिलो नायक पर्शुराम चौधरी र चर्चित गायक श्रीकृष्ण लुइटेल ‘बोके दारी’ ले संयुक्त रूपमा म्युजिक भिडियोको विमोचन गरेका थिए। कार्यक्रममा बोल्दै अतिथिहरूले गीतले मनोरञ्जनका साथै समाजमा व्याप्त कुरीति विरुद्ध कडा सन्देश दिएको चर्चा गरे। प्रवलदीप विश्वासको आफ्नै शब्द, संगीत र मुख्य स्वर रहेको यस गीतमा गायिका नीतु चौधरीले स्वरमा साथ दिएकी छन्। गीतलाई सञ्जय हमालले सुमधुर संगीत संयोजन गरेका छन्।
कार्तिक राजवंशीको निर्देशनमा तयार भएको यस भिडियोलाई निकै कलात्मक र सन्देशमूलक बनाइएको छ। रबिन चौधरीले क्यामेरामा कैद गरेको भिडियोको दृश्य सम्पादन र रंगरोगनको जिम्मा पनि निर्देशक राजवंशी स्वयंले सम्हालेका छन्। गीतको ध्वनि रेकर्डिङ हारुन रसिद र मिश्रण बिजेन श्रेष्ठले गरेका छ्न् भने कलाकारहरूको शृङ्गार अवध नारायण राजवंशीले गरेका छन् ।
रक्सीको लतले पार्ने प्रभावलाई जीवन्त उतार्न भिडियोमा कलाकारहरूको ठूलो टोलीले अभिनय गरेको छ। जसमा सनम चौधरी, राजेश राजवंशी, पाण्डव चौधरी, सरोज चौधरी, विक्की राजवंशी लगायत डेढ दर्जन कलाकारहरूको अभिनय रहेको छ। गायक प्रवलदीप विश्वासकै आधिकारिक युट्युब च्यानलबाट सार्वजनिक गरिएको छ ।
Discussion about this post