दोहोरी साँझमा रुषा सँग झुमे दया र सौगात: ‘मितज्यू’ को नयाँ गीतमा युवा आकर्षण

विशेष अनलाइन । दुई हस्ती दयाहाङ राई र सौगात मल्लको सहकार्य सुन्नेबित्तिकै दर्शकमा एक किसिमको उत्साह पैदा हुन्छ। त्यसमाथि यो जोडी अब ‘मितज्यू’ बनेर पर्दामा आउँदैछन्। आगामी जेठ ८ गतेलाई प्रदर्शन मिति तोकेको यस चलचित्रले आफ्नो दोस्रो प्रस्तुतिको रूपमा लोकलयको स्वाद पस्केको ‘भुनभुन माहुरी’ सार्वजनिक गरेको छ।

टिजर र यसअघिको गीत ‘गैराघरे काइँली’ ले बजार तताइरहेका बेला निर्माण पक्षले आइतबार श्रीकृष्ण बम मल्ल र लक्ष्मी मल्लको युगल स्वरमा सजिएको यो नयाँ गीत ल्याएको हो। युवायुवतीबीचको ठट्टा र प्रेमिल आकर्षणलाई समेटिएको यस गीतमा श्रीकृष्णकै शब्द र संगीत छ। एउटा जीवन्त दोहोरी साँझको माहोलमा खिचिएको गीतको भिडियोमा दयाहाङ, सौगात र रुषा न्यौपानेको ‘छमछमी’ नृत्य देख्न सकिन्छ।

‘मितज्यू’ केवल एउटा चलचित्र मात्र नभई नेपाली समाजको गहिरो ‘मितेरी साइनो’ को कथा हो। यो चलचित्रको अर्को मुख्य आकर्षण भनेको चर्चित डान्सर तेरिया फौजा मगरको डेब्यु हो। तेरियाले अभिनेत्रीको रूपमा कस्तो जादु देखाउने हुन्, त्यो हेर्न दर्शक निकै उत्साहित छन्। चलचित्रमा पुष्कर गुरुङ, शिशिर वाङ्देल, राज थापा लगायतका सशक्त कलाकारहरूको पनि अभिनय छ।

व्यावसायिक रूपमा सफल चलचित्र ‘घरज्वाइँ’ पछि निर्देशक अनिल बुढा मगर र लगानीकर्ता जनक घर्ती मगरको जोडीले पुन: ‘मितज्यू’ मार्फत सहकार्य गरेको हो। जीएम मुभिज प्रोडक्सनको ब्यानरमा बनेको यस चलचित्रलाई महेश राईले लेखेका हुन् भने लोकेश बज्राचार्यले सम्पादन गरेका हुन्।