विशेष अनलाइन । एम थापाले निर्देशन गरेको चलचित्र ‘लालीबजार’ को एउटा लोकलयको गीतले यतिबेला युट्युबमा तरंग पैदा गरेको छ। चलचित्रमा समावेश ‘मै राम्री छु त नि’ बोलको गीतको छोटो अंशले मात्रै ३,८८,०९३ भन्दा बढी भ्यूज बटुल्दै दर्शकको मन जित्न सफल भएको हो।
बहुप्रतिभाशाली सर्जक प्रकाश सपूतको शब्द र संगीत रहेको यो गीतमा दीपिका बयम्बू मगरको स्वर रहेको छ। गीतको भिडियोमा अभिनेत्री स्वस्तिमा खड्काको आकर्षक नृत्य र ऊर्जाले दर्शकलाई चलचित्र प्रति थप आकर्षित गरेको छ। निर्माता कम्पनी षट्कोण आर्ट्सले गीतको डेढ मिनेट मात्रै सार्वजनिक गरे पनि यसको चर्चा भने चौतर्फी छ। निर्देशक यम थापाका अनुसार गीतको बाँकी रौनक हेर्न भने दर्शकले चलचित्र नै कुर्नुपर्नेछ।
तर, यो गीत केवल नाचगानमा मात्र सीमित छैन। चलचित्रले समाजको एउटा निकै कठोर र संवेदनशील पाटो ‘नथिया प्रथा’ (कुमारित्व किनबेच) लाई पर्दामा उतार्दैछ। आमा र छोरीको हृदयविदारक भावनात्मक सम्बन्धलाई मुख्य कथा बनाइएको यस चलचित्रले ‘लालीबजार’ भित्रका लुकेका व्यथाहरूलाई उजागर गर्ने कोसिस गरेको छ।
वैशाख १८ गतेबाट प्रदर्शनमा आउन लागेको चलचित्रमा स्वस्तिमा खड्काको साथमा रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल लगायतका पाका तथा आशालाग्दा कलाकारहरूको अभिनय रहेको छ। यसै चलचित्रबाट विशाल देवकोटा र प्रशंसा सुवेदीले नेपाली रजतपटमा आफ्नो पाइला अगाडि बढाएका छन्।
निर्देशक यम थापा र प्रदीप भट्टराईको पटकथा लेखन रहेको यस चलचित्रमा शन प्रजापतिको छायांकन, मित्र डी. गुरुङको सम्पादन तथा प्रकाश सपूत, खेम सेन्चुरी र जयन जे वाइवाको संगीत रहेको छ । चलचित्रका कार्यकारी निर्माता प्रदीप भट्टराई हुन् भने म्याक्स दीपेश खत्री र रवीन्द्रसिंह बानियाँ निर्मातामा छन् ।
Discussion about this post