सौगात मल्ल र सुहाना थापाको मुख्य अभिनय रहेको चलचित्र ‘परालको आगो’ अब अमेरिका र क्यानडामा पनि प्रदर्शन हुने भएको छ। निर्माण पक्षका अनुसार त्यहाँका दर्शकहरूका लागि ‘चलचित्र इएनटी’ले यसको वितरण अधिकार किनेको हो। यसले गर्दा विदेशमा रहेका नेपालीहरूले पनि यो बहुप्रतिक्षित चलचित्र हेर्ने अवसर पाउनेछन्।
लक्ष्मण सुनारले निर्देशन गरेको यस चलचित्रमा सौगात र सुहानाका साथै प्रकाश सपुत पनि मुख्य भूमिकामा देखिनेछन्। सुशील पोखरेल निर्माता रहेको यस चलचित्रले गाउँले परिवेश, परिवारभित्रको सम्बन्ध र समाजमा मानिसहरूले भोग्ने मानसिक तथा भावनात्मक संघर्षको कथालाई पर्दामा उतारेको छ।
हरि ॐ सिने मेकर्स प्रालिको ब्यानरमा बनेको यो चलचित्र सुशील देवकोटाले लेखेका हुन् भने संकल्प भुजेलले छायांकन गरेका हुन्। नेपालमा यसको वितरण आर फिल्मसले गर्दैछ भने डिजिटल अधिकार ओएसआर डिजिटलले लिएको छ। गुरुप्रसाद मैनालीको ‘नासो’ कथा संग्रहमा समावेश कथा ‘परालको आगो’ नाममा ४५ वर्षअघि प्रताप सुब्बाले चलचित्र बनाएका थिए ।
Discussion about this post