विशेष अनलाइन । कमेडियन तथा अभिनेता सागर लम्साल ‘बले’ को मुख्य भूमिका रहेको प्रतिक्षित चलचित्र ‘डल्लेले इन्ट्री मार्यो’ प्रदर्शनको तयारीमा जुटेको छ। आगामी चैत २७ गतेबाट देशभर प्रदर्शनमा आउने तयारीमा रहेको यस चलचित्रको निर्माण टिमले हालै ‘फर्स्ट लुक्स’ पोस्टर सार्वजनिक गरेको छ। सार्वजनिक पोस्टरमा मुख्य अभिनेता लम्साललाई विशिष्ट गेटअपमा देख्न सकिन्छ।
पोस्टरको प्रस्तुति र दृश्यहरूले यो चलचित्रमार्फत निर्देशकले युवा पुस्तामा बढ्दो कुलत तथा लत को विषयमा कुनै गम्भीर सामाजिक सन्देश दिन खोजेको अनुमान गर्न सकिन्छ। राजु गिरी निर्देशित यो चलचित्रको पटकथा र संवाद लक्ष्मण सुवेदी ले लेखेका छन्। चलचित्रको कथा उमेश कुमार बस्नेतले तयार पारेका हुन्। छायांकन श्याम तामाङ ले गरेका छन्।
चलचित्रको अधिकांश छायांकन कास्कीको रमणीय गाउँ याङ्जाकोट मा गरिएको छ, भने केही महत्त्वपूर्ण दृश्यहरू काठमाडौँको गागलफेदीमा पनि खिचिएका छन् । यस चलचित्रमा सागर लम्सालका साथमा रोशनी खड्का, रमेश बुढाथोकी, हेमन्त बुढाथोकी, रवीन्द्र झा, कैलास रावत, विशाल पहाडी लगायत ठूलो संख्यामा अनुभवी कलाकारहरूको अभिनय रहेको छ । निर्देशक राजु गिरी स्वयंले पनि यस चलचित्रमा अभिनय गरेका छन्। बाल कलाकारहरूमा कंगना गिरी, रोनिश खड्का र काजल गिरी रहेका छन्।
उषा फिल्म प्रा.लि . को ब्यानरमा निर्माण भएको यो चलचित्रका निर्माताहरूमा सावित्री चिलुवाल, आशिक बस्नेत, आदर्श बस्नेत, निर्मला बस्नेत र सरिता पुरी गिरी रहेका छन्। चलचित्रको वितरणको जिम्मा नेसनल सिने ग्रुप ले लिएको छ ।
Discussion about this post