विशेष अनलाइन । नेपाली चलचित्र उद्योगका सुपर स्टार भुवन केसीले लामो अन्तरालपछि निर्देशनमा पुनरागमन गरेका छन्। नराइज पिक्चर्स प्राली को ब्यानरमा निर्माण हुने नयाँ चलचित्र ‘बाटुलो जून’ को औपचारिक शुभसाइत शुक्रबार पाटनस्थित बगलामुखी मन्दिर मा सम्पन्न भएको छ। क्यामेरा र स्कृप्ट पूजासँगै निर्माण टोली चलचित्रको छायाङ्कनका लागि फ्लोरमा निस्केको छ। भुवन केसीको पछिल्लो निर्देशित चलचित्र ‘ड्रिम्स’ रिलिज भएको झन्डै १० वर्षपछि उनले यो चलचित्रमार्फत ‘एक्सन कट’ भन्दै पुनरागमन गरेका हुन्।
यो चलचित्र ग्रामीण परिवेशमा आधारित विशुद्ध प्रेमकथा रहेको निर्देशक भुवन केसीले बताएका छन्। चलचित्रमा भुवन केसी आफैं पनि प्रमुख अभिनयमा देखिनेछन्। मुख्य नायकको भूमिकामा भने उनका छोरा अनमोल केसी रहेका छन्। अनमोललाई अभिनेत्रीद्वय प्रिन्सी खतिवडा र नेन्सी खड्काले साथ दिनेछन्। यसबाहेक, प्रकाश घिमिरे, रेअर राई, दिपक केसी, श्वेता मिश्र, लक्ष्मी गिरी, शारदा गिरी, लक्ष्मीनाथ तिमिल्सिना, शिशिर शिवाकोटी, अर्पणा घतानी, विविका पौडेल र कमल देवकोटा को पनि अभिनय रहनेछ।
चलचित्रमा जोडिएपछि अभिनेता अनमोल केसीले पिता भुवन केसीका सफल चलचित्रहरू, जस्तै ‘चिनो’, ‘सम्झना’ र ‘कुसुमे रूमाल’ मा देखिएको लुक र भूमिकाको स्मरण गर्दै आफूलाई पनि त्यसै रूपमा पाएको बताए। घुमाउरो पाराले उनले यस चलचित्रमार्फत बुवाको विरासतलाई नयाँ ढंगले अगाडि बढाउने संकेत गरे। उनले यस चलचित्रमा आफ्नो बोली, भाषा र प्रस्तुतिमा भिन्नता ल्याइने बताउँदै सम्पूर्ण टिमको मिहिनेतले चलचित्रलाई सफल बनाउने विश्वास व्यक्त गरे।
‘बाटुलो जून’ लाई जीया केसी र भविष्य खड्का ले निर्माण गर्ने भएका छन्। निर्मात्री खड्का यसअघि सफल चलचित्र ‘जेरी अन टप’ को निर्मात्री समेत हुन्। चलचित्रको पहिलो चरणको छायाङ्कन ४५ दिनसम्म चल्ने तालिका छ। यसका लागि काठमाडौँ, ढोरपाटन, काभ्रेपलाञ्चोक, चित्लाङ र पोखरा लगायतका सुन्दर स्थानहरूलाई छनौट गरिएको छ।
चलचित्रको लेखनमा सामिप्यराज तिमिल्सेना र सरिन पोखरेल को संयुक्त प्रयास रहेको छ। तेजबिक्सम केसी कार्यकारी निर्माता छन्। छायाङ्कनको जिम्मा राजेश श्रेष्ठ ले लिएका छन् भने कोरियोग्राफी रेनशा वान्तवा राई ले गर्नेछिन्।
Discussion about this post