विशेष अनलाइन । सयौं म्युजिक भिडियो निर्देशनबाट चिनिएका जीवन शाही को डेब्यु निर्देशकीय चलचित्र ‘स्त्री’ ले आफ्नो प्रदर्शन मिति घोषणा गरेको छ। निर्माण पक्षले आइतबार आकर्षक शीर्षक लोगो डिजाइन सार्वजनिक गर्दै सामाजिक कथावस्तुमा आधारित यो चलचित्र आउँदो फागुन २९ गते (२०८२ साल) देखि देशभर प्रदर्शनमा आउने जानकारी दिएको छ। ‘मेला रेकर्डिङ स्टुडियो’ को ब्यानरमा निर्मित यो चलचित्रको पटकथा लेखन किशन अर्याल ले गरेका हुन्, जसको प्रदर्शन तयारी अन्तिम चरणमा पुगेको छ।
चलचित्रका मुख्य निर्माता समीर राई हुन् भने सहदेव विष्ट, प्रमोद भट्टराई प्रतीक, रीता श्रेष्ठ र मञ्जु राजवंशी ले सह-निर्माताका रूपमा साथ दिएका छन्। चलचित्रमा अनुभवी तथा नयाँ पुस्ताका कलाकारहरूको बलियो उपस्थिति रहेको छ। प्रमुख कलाकारहरूमा प्रमोद अग्रहरी, सलोन बस्नेत, रिस्ता बस्नेत, नम्रता श्रेष्ठ, दिनेश डिसी र दीपाश्री निरौला लगायत रहेका छन्। बालकलाकार दिप्सन चिलवाल ले पनि यसमा अभिनय गरेका छन्।
हाल यो चलचित्रको सम्पादन कार्य तीव्र गतिमा चलिरहेको निर्माता समीर राईले बताएका छन्। फागुनको अन्तिम सातामा दर्शकमाझ चलचित्र ल्याउने उद्देश्यका साथ प्राविधिक टोली सक्रियताका साथ काममा जुटेको छ। जीवन शाहीको डेब्यु निर्देशन र स्थापित कलाकारहरूको अभिनय संयोजनले गर्दा यो चलचित्रलाई लिएर दर्शकमा उत्साह बढेको छ।
नेपाली चलचित्र बजारमा फागुन २९ गते प्रतिस्पर्धामा उत्रिन लागेको ‘स्त्री’ ले सामाजिक कथावस्तु र बलियो कलाकारहरूको प्रस्तुति मार्फत आफ्नो स्थान बनाउने विश्वास गरिएको छ। डेब्यु निर्देशकको पहिलो प्रयास र प्रभावशाली कलाकारहरूको उपस्थिति यसको मुख्य आकर्षणको रूपमा रहेको छ।
Discussion about this post