विशेष अनलाइन । अभिनेता धीरज मगर र ‘ऐरी’ चलचित्रका निर्माताबीच देखिएको विवाद समाधान भएको छ। चलचित्र निर्माता संघको मध्यस्थतामा बुधबार भएको छलफलपछि दुवै पक्षबीच सहमति भएको संघका अध्यक्ष नवल खड्काले जानकारी दिएका छन्।
निर्माता कम्पनी मल्टिमेट प्रालिका तर्फबाट कमलबहादुर आलेले २ भदौमा संघमा उजुरी दर्ता गराएका थिए। उजुरीमा धीरजले सम्झौताअनुसार छायांकनमा समय नदिएर चलचित्रलाई करिब १४ करोड रुपैयाँ बराबरको क्षति भएको दाबी गरिएको थियो।
उक्त उजुरीपछि संघले दुवै पक्षलाई बोलाएर छलफल गराएको थियो। छलफलमा धीरजले तोकिएको अवधिमा छायांकनका लागि समय दिने सहमति जनाएका छन्। सम्झौताअनुसार आगामी अक्टोबर ५ देखि नोभेम्बर १५ भित्र धीरज छायांकनमा सहभागी हुने भएका छन्। मिति तलमाथि भएमा आपसी छलफलमार्फत अघि बढ्ने सहमति भएको पनि संघले जनाएको छ।
निर्माताको दाबीअनुसार धीरजले चलचित्रका लागि तोकिएको ४४ दिनमध्ये १६ दिन मात्र छायांकनमा सहभागी भएका थिए। उनलाई १० लाख रुपैयाँ पारिश्रमिकमा ४ लाख अग्रिम बुझाइए पनि बाँकी समय सुटिङमा उपस्थित नभएको भनिएको थियो।
चलचित्र ‘ऐरी’ को छायांकन केही समयअघि ढोरपाटन क्षेत्रमा सम्पन्न भएको थियो। करिब एक वर्षसम्म निरन्तर खिचिने योजना भए पनि बीचमा अवरोध आएकोमा हाल फेरि छायांकन अघि बढ्ने भएको छ।
Discussion about this post