विशेष अनलाइन । पूर्व प्रधानमन्त्री डा. बाबुराम भट्टराईले कलाकारहरूमा केन्द्रमुखी कलाको मानसिकताका कारण मनोरञ्जन नगरी पछि परेको बताएका छन् । नेपाल चलचित्र संघ, पुर्वाञ्चल शाखाले आयोजना गरेको म्युजिक भिडियो विमोचन तथा सम्मान कार्यक्रमलाई सम्बोधन गर्दै पूर्व प्रधानमन्त्री डा. भट्टराईले काठमाण्डौमा भएका कलाकारहरू ठुला हुन्छन् र उनीहरू मात्र कलाका क्षेत्रमा निपुण हुन्छन् भन्ने मानसिकता सबैले त्याग्न आवश्यक रहेको बताएका हुन् ।
‘नेपालका कुना कन्दराहरुमा त्यस्ता धेरै प्रतिभाहरू छन्, जसले अवसर नपाएकै कारण आफू भित्रको प्रतिभा सार्वजनिक गर्न असमर्थ छन्’, पूर्व प्रधानमन्त्री डा. भट्टराईले भने । कार्यक्रममा वरिष्ठ लोक गायक तथा सङ्गीतकार फणीन्द्र सुवेदीको स्वर तथा निर्देशक परशुराम चौधरीको निर्देशनमा तयार भएको म्युजिक भिडियो देखाइएको थियो ।
झुम्काको म्युजिक सिनेमा हलमा आयोजित कार्यक्रममा बोल्दै नेपाल चलचित्र संघ, पुर्वाञ्चल शाखाका सभापति परशुराम चौधरीले कोशी प्रदेश कलाको खानी भएको उल्लेख गर्दै राज्य स्तरबाट कलाकारहरूको सम्मान आवश्यक रहेको उल्लेख गरे ।
कार्यक्रममा वरिष्ठ लोक गायक तथा सङ्गीतकार सुवेदीको स्वर तथा निर्देशक चौधरीको निर्देशनमा तयार भएका म्युजिक भिडियोका कलाकार तथा प्रचार प्रसारमा योगदान गर्ने चलचित्र पत्रकारहरूलाई सम्मान गरिएको थियो ।
म्युजिक भिडियोमा योगदान गर्ने वरिष्ठ लोक गायक तथा सङ्गीतकार फणीन्द्र सुबेदी, लेखक तथा कलाकार रेणु चौधरी, मोडल तथा कलाकार दिनेश कोइराला, मोडल तथा कलाकार मेनुका माझी, नृत्य निर्देशक तुलसी घिमिरे,निर्देशक कार्तिक राजवंशी, गायक तथा सङ्गीतकार प्रवलदिप विश्वास, कलाकार जयनारायण चौधरी, छायाकार तथा सम्पादक हेमन तामाङ लगायतलाई सम्मान गरिएको थियो । कार्यक्रममा अन्य विभिन्न कलाकारहरूलाई कदर पत्र तथा प्रोत्साहन पत्रद्वारा समान गरिएको थियो ।
म्युजिक भिडियो प्रचार प्रसार तथा समग्र चलचित्र पत्रकारितामा योगदान पुर्याएको भन्दै चलचित्र पत्रकार संघ सुनसरी शाखाका उपाध्यक्ष मनोज दाहाल तथा चलचित्र पत्रकार संघ कोशी प्रदेश सहसचिव विकल श्रेष्ठलाई सम्मान गरिएको थियो । कार्यक्रममा वरिष्ठ लोक गायक तथा सङ्गीतकार फणीन्द्र सुवेदीको जीवनी साथै कला क्षेत्रमा पुर्याएको योगदानको भिडियो चित्र सहित उनले गाएका गीतका छोटकरी अंशहरू प्रस्तुत गरिएको थियो ।
Beta feature
Discussion about this post