बिशेष अनलाइन । सञ्चारकर्मीहरुलाई सम्मान र प्रोत्साहन गर्ने उद्देश्य सहित पहिलो पटक मिडिया अवार्ड आयोजना हुने भएको छ । ड्रिम हाइ नेपाल प्रा लि को आयोजना र नेपाल पत्रकार महासंघको सहकार्यमा हुने अवार्डको बुधबार राजधानीको होटल सोल्टीमा आयोजित एक कार्यक्रम मार्फत औपचारिक घोषणा गरियो ।
‘नेपाल मिडिया अवार्ड २०७८’ नाम दिइएको उक्त अवार्ड कुल २५ विधामा वितरण हुने आयोजकले जनाएको छ । ‘टेलिभिजन, छापा मिडिया, एफएम रेडियो र अनलाईन पत्रकारिता अन्तर्गत सञ्चार माध्यम र सञ्चारकर्मीहरुको पछिल्लो एक वर्षयताको उपस्थिति र प्रस्तुतिलाई आधार बनाएर सम्मान प्रदान गरिने बताइएको छ । आयोजक संस्थाका प्रवन्ध निर्देशक कमल जिसीका अनुसार उल्लेखित विधा बाहेक भुगोलतर्फको सात प्रदेशबाट २,२ जनालाई सम्मान गरिने छ । यस्तै नेपाली मिडियाको विकासक्रममा योगदान गर्ने दुई विशिष्ठ सञ्चारकर्मीलाई ‘लाइफटाइम एचिभमेन्ट’ सम्मान प्रदान गरिनेछ ।
नेपाल पत्रकार महासंघसँगको समन्वयमा महासंघका पुर्व अध्यक्ष, सञ्चार विज्ञसहितको ५ सदस्यीय निर्णायक टिमले सम्मानित सञ्चारकर्मीहरुको छनोट गर्ने आयोजकले बताएको छ । कार्यक्रममा पत्रकार महासंघका सचिव पवन आचार्यले सञ्चारकर्मीहरुको कामलाई सम्मान गर्ने र हौसला दिने काममा महासंघले सहकार्य गर्न पाएको भन्दै खुशी व्यक्त गरे ।
पौष २३ मा आयोजना हुने उक्त अवार्ड समारोहको घोषणा कार्यक्रममा शुभकामना दिन वरिष्ठ सञ्चारकर्मी ऋषि धमला, वरिष्ठ सञ्चारकर्मी तथा फिल्म निर्देशक दिनेश डिसी, नेपाली फिल्म अभिनेता रमेश उप्रेती लगायत पत्रकारितासँग प्रतिनिधित्व गर्ने दर्जनबढि संस्थाका अध्यक्ष तथा प्रतिनिधिहरु उपस्थित थिए ।
कार्यक्रममा प्रायोजक कम्पनि ‘ब्ल्याकहर्स सूज इन्डष्ट्रिज प्रा लि र जोय पपैया नेपालसँग आयोजकले प्रायोजन सम्झौता समेत गरेको थियो । आयोजकको तर्फबाट ड्रिम हाइ नेपालका प्रवन्ध निर्देशक जिसीले ब्ल्याक हर्स सूजका चीनबहादुर श्रेष्ठ र जोय पपैया नेपालका कन्ट्री म्यानेजर मदन रौनियारसँग सम्झौता आदान प्रदान गरेका थिए । अवार्ड समारोहलाई निष्पक्ष र विवादरहित बनाउने मुल उद्देश्य रहेको भन्दै सञ्चारकर्मीहरुको श्रम सम्मानमा हुन लागेको यो प्रकारको कार्यक्रममा साथ सहयोग र सद्भावको अपेक्षा आयोजकले व्यक्त गरेको छ ।
Discussion about this post