विशेष अनलाइन । नेपाली चलचित्र ‘आबाट आमा’ को ट्रेलर सार्वजनिक भएको छ। निर्माण टिमले काठमाडौँमा एक कार्यक्रमको आयोजना गर्दै चलचित्रको ट्रेलर सार्वजनिक गरेको हो । ओएसआर डिजिटलमार्फत सार्वजनिक गरिएको यस ट्रेलरमा पारिवारिक भावनात्मक सम्बन्ध र आधुनिक युगको संघर्षलाई निकै कलात्मक ढंगले प्रस्तुत गरिएको देखिन्छ। विशेषगरी आमा र छोराको मर्मस्पर्शी सम्बन्धलाई केन्द्रमा राखेर तयार पारिएको यो चलचित्रले दर्शकलाई भावुक बनाउने संकेत गरेको छ।
ट्रेलरमा पौराणिक पात्रहरू कृष्ण, राधा, देवकी र वासुदेवको प्रसंग जोड्दै पात्रहरूको जीवनलाई परिभाषित गर्न खोजिएको छ। वैदेशिक रोजगारीका लागि गाउँ छोडेर युरोप, अष्ट्रेलिया र खाडी मुलुक जाने वर्तमान युवा पुस्ताको बाध्यता र त्यसले निम्त्याउने पारिवारिक बिछोडको पीडालाई ट्रेलरमा सशक्त रूपमा उतारिएको छ। चलचित्रले संसारलाई एउटा ‘कुरुक्षेत्र’ र जीवनलाई ‘महाभारत’ को युद्धसँग तुलना गर्दै हरेक व्यक्तिको आफ्नै संघर्ष हुने सन्देश दिन खोजेको देखिन्छ।
आगामी माघको १६ गतेबाट रिलिज हुने चलचित्रमा प्रदीप रावत, विपना थापा र पल शाहका अलवा सिम्रन पन्त, साइग्रेस पोखरेल, उषा उप्रेती, रविन्द्र झा, गजित बिष्ट, अंशु महर्जन, बेगम नेपाली लगायतका कलाकारहरुको अभिनय रहेको छ । साथै बालकलाकारमा समाइरा थापा र शान अधिकारी रहेका छन्।
चन्द्र पन्तको निर्देशनमा तयार भएको चलचित्रको कथा तथा पटकथा समेत निर्देशक पन्त स्वयंले लेखेका छन्। चलचित्रको गीतहरूमा कोसिस क्षेत्री, बाबुल गिरी र थानेश्वर गौतमले सङ्गीत गरेका छन्। गीतको भिडियोमा कोरियोग्राफीको जिम्मेवारी गम्भीर विष्ट र दिलीप ओखेडाले गरेका छ्न् ।.
चलचित्रको निर्माणमा कृष्ण प्रसाद सुवेदी, ओमकार पन्त, प्रकाशजंग कुँवर, ध्रुव प्रसाद न्यौपाने र क्षितिज ढुंगानाले लगानी गरेका छन् । चलचित्रको कार्यकारी निर्माता करण सिंह रसाली हुन् । व्यावसायिक रूपमा चलचित्रको प्रदर्शन अधिकार आरआर फिल्मस्ले लिएको छ । चलचित्रको डिजिटल अधिकारको रुपमा ओएसआर डिजिटल रहेको छ।
Discussion about this post