विशेष अनलाइन। सत्ताको खेल र जनताको अवस्थालाई मुख्य विषय बनाइएको चलचित्र ‘बिगुल’ को ट्रेलर सार्वजनिक भएको छ। चलचित्रको ३ मिनेट लामो ट्रेलरले समाजमा व्याप्त निराशा, युवाहरूको आक्रोश र दुई पुस्ताबीचको वैचारिक द्वन्द्वलाई प्रखर रूपमा उजागर गरेको छ। विशेषगरी सामाजिक न्याय र क्रान्तिको खोजीमा रहेका नागरिकको कथालाई चलचित्रले उठाएको छ।
चलचित्रको ट्रेलरमा अभिनेत्री बेनिशा हमालको एउटा संवादले निकै चर्चा पाएको छ— ‘क्रान्ति जहाँबाट पनि सुरु हुन्छ। जबसम्म हामी जनताको पीडा सुन्दैनौं, क्रान्ति गर्न सक्दैनौं।’ यो शक्तिशाली संवादले चलचित्रको मूल मर्मलाई प्रष्ट पार्छ। ट्रेलरले आम नागरिकलाई सही नेतृत्व छनोट गर्न र समाज परिवर्तनका लागि आफ्नो भूमिका बुझ्न घच्घच्याउने अपेक्षा गरिएको छ।
चलचित्रमा बेनिशा हमाल, रमेश बुढाथोकी, नरेन खड्का, नीर शाह, सरोज खनाल, हेमन्त बुढाथोकी, शिशिर वाङ्देल, विनोद न्यौपाने र गीता अधिकारी लगायतका कलाकारहरूको अभिनय रहेको छ।
रमेश कोइरालाको निर्देशनमा तयार भएको यस चलचित्रमा दिनेश कोइरालाको कथा तथा निर्माण रहेको छ। कल्पना पौडेल प्रस्तुतकर्ता रहेको यस चलचित्रका सह-निर्माताहरू सूर्य कान्त कोइराला र महेश कोइराला हुनुहुन्छ। चलचित्रलाई प्राविधिक रूपमा उत्कृष्ट बनाउन शिव ढकालको छायांकन, प्रदीप भारद्वाज र मौनता श्रेष्ठको पटकथा एवं संवाद तथा तारा थापा (किम्भे) को सम्पादन रहेको छ।
चलचित्रमा नेपाली कांग्रेसका महामन्त्री विश्वप्रकाश शर्मा, संगीतकार अर्जुन पोखरेल र मनोज चौलागाईंले संगीत दिएका छन्। चलचित्रमा कमल राई र कविराज गहतराजको नृत्य निर्देशन, एवं एनबी महर्जनको द्वन्द्व निर्देशन रहेको छ। समाजमा परिवर्तनको शंखघोष गर्न खोज्ने चलचित्र आगामी माघ ९ गते बाट देशभरका सिनेमा हलहरूमा प्रदर्शनमा आउँदैछ।
Discussion about this post