विशेष अनलाइन । नेपाली चलचित्र ‘अभिमन्यु : च्याप्टर १’ को बहुप्रतिक्षित ट्रेलर आज एक भव्य कार्यक्रमका बीच सार्वजनिक गरिएको छ। तर, ट्रेलर रिलिजकै दिन केही पत्रकारले कलाकारको अभिनय क्षमता र उपस्थितिलाई लक्षित गरेर सोधिएका प्रश्नले कार्यक्रममा हलचल मच्चाएको छ। यही प्रसंगलाई लिएर चलचित्रका निर्माता विनोद पौडेल खुलेर असन्तुष्टि व्यक्त गरेका छन्।
पौडेलले सामाजिक सञ्जाल फेसबुकमार्फत आफ्नो मनको कुरा व्यक्त गर्दै भनेका छन्, “राम्रो अभिनय गर्न सक्ने र गर्न नसक्ने कलाकार हुन्छन् होला, तर ‘फरी कहाँबाट आयो यो नचलेको कलाकार’ भन्ने खालको प्रश्न गर्नु कति उपयुक्त हो ? अभिमन्युको ट्रेलर हेर्दा के साँच्चिकै त्यस्तो लाग्छ ? कलाकारलाई अपमान गर्ने भाषाभन्दा underrated भन्ने शब्द प्रयोग गर्दा पनि हुन्थ्यो।”
उनले थप लेखेका छन्, “कलाकारलाई अपमान गरेर समाचार लेख्दा वा प्रश्न गर्दा कस्तो मानसिक असर पर्छ भन्ने बुझ्न जरुरी छ। प्रश्न सोध्नु पत्रकारको अधिकार हो, तर शब्द चयनमा संवेदनशील हुनुपर्छ।”
निर्माता पौडेललाई यसअघि पनि कलाकारलाई ‘मुख्य भूमिकामा स्थापित गर्ने’ शैलीका लागि चिनिन्छन्। उनले निर्माण गरेको चलचित्र ‘पूर्ण बहादुरको सारङ्गी’ मा सहायक भूमिकाबाट मात्र चिनिँदै आएका कलाकार विजय बराललाई पहिलो पटक मुख्य पात्रमा उतारेका थिए। सो चलचित्रले ऐतिहासिक व्यापारिक रेकर्ड कायम गर्दै नेपाली बक्स अफिसमा तहल्का मच्चाएको थियो।
ठीक त्यस्तै, ‘अभिमन्यु : च्याप्टर १’ मा पनि उनले वर्षौंदेखि सहायक पात्रमा सीमित रहँदै आएका कामेश्वर चौरासियालाई पहिलो पटक मुख्य पात्रको रूपमा प्रस्तुत गरेका छन्। पौडेलको विश्वास छ, चौरासियाको अभिनय यात्राले यसपटक दर्शकलाई नयाँपन दिनेछ।
सुशान्त गौतमको निर्देशन रहेको चलचित्रको कथा मुकेश खनालले लेखेका हुन् । चलचित्र निर्माणमा बिनोद पौडेललाई गुन्जन गिरीले सघाएका छन् । चलचित्रमा चौरासियाका अलावा गौमाया गुरुङ, लक्ष्मी बर्देवा, सरिता गिरी, प्रकाश दाहाल, शिशिर वाङ्देल, किरण श्रेष्ठ, सुष्मा निरौला, अनिल कुर्मी लगायतका कलाकारको भुमिका छ ।
चलचित्र ‘अभिमन्यु : च्याप्टर १’ ले तराई क्षेत्रको कथा, संस्कृतिको विविधता र त्यहाँको समाजले भोगिरहेका चुनौतीलाई उठाएको बताइएको छ। निर्देशक र निर्माण पक्षका अनुसार, चलचित्रमा मनोरञ्जनसँगै सामाजिक सन्देश पनि समेटिएको छ। ट्रेलरमा देखाइएको झलकले चलचित्रमा प्रेम, संघर्ष र न्यायका विषयलाई जोडिएको अनुमान लगाउन सकिन्छ।
आज सार्वजनिक ट्रेलरमा प्रस्तुत दृश्य, संवाद र पृष्ठभूमि संगीतले उपस्थित दर्शक र पत्रकारलाई उत्साहित बनाएको थियो। विशेषगरी, मुख्य पात्र कामेश्वर चौरासियाको नयाँ अवतार, दमदार संवाद र भावनात्मक प्रस्तुति चर्चामा आयो।
चलचित्र ‘अभिमन्यु : च्याप्टर १’ आगामी भाद्र २७ गतेदेखि देशव्यापी प्रदर्शनमा आउने तयारीमा छ। यसअघि नै ऐतिहासिक सफलता पाइ सकेको निर्माता पौडेलले यसपटक पनि दर्शकको अपेक्षालाई चुल्याउने विश्वास लिएका छन्।
Discussion about this post