विशेष अनलाइन । फ्राइडे रिलिज अन्तर्गत शुक्रवारबाट पूजा शर्मा अभिनीत एक्सन चलचित्र ‘दान्भी’र स्वर्गीय भजन शिरोमणि भक्तराज आचार्यको जीवन कथा आधारित चलचित्र ‘आचार्य’ प्रदर्शनमा आएका छन् । दुई चलचित्रको तुलनामा चलचित्र ‘दान्भी’ ले उत्साहजनक शो पाएको छ। रुपेश तामाङको निर्देशनमा तयार भएको चलचित्र ‘दान्भी’मा पूजा शर्मा केन्द्रीय भूमिकामा छिन् । यस चलचित्रमा पूजालाई एक्सन अवतारमा देख्न पाइने छ । लभ स्टोरी चलचित्रहरूमा रुचाइएकी नायिका पूजा शर्माले पहिलो पटक ‘दान्भी’ मार्फत आफूलाई एक्सन लयमा उभ्याएकी हुन् ।
उत्साहजनक शो पाएको हिसाबले पनि चलचित्रले उत्कृष्ट व्यापार गर्नेमा निर्माण पक्ष आसावादी छ । चलचित्रको प्रचार प्रसारमा पनि कुनै कमी नछाडेको निर्माण पक्षको दाबी छ । चलचित्रमा पूजाका अलावा कुन्साङ बम्जन, किरण श्रेष्ठ, मोनालिसा खतिवडा, राजाराम पौडेल, कालु राणा, सीता तामाङ लगायत कलाकारको पनि अभिनय छ। पवन राना मगर चलचित्रका कार्यकारी निर्माता हुन् भने देव मगर र अनुप गडाल निर्माता हुन् । कमला लिम्बु, पन्चबहादुर तामाङ र आदर्श पौडेल चलचित्रका सह–निर्माता हुन् ।
चलचित्रमा सन्जोग राणाको पटकथा तथा संवाद, रविना थापा मगरको कथा, हरिप्रसाद घलेको छायाङ्कन, बन्दे प्रसादको सम्पादन, श्री श्रेष्ठको एक्सन, कविराज गहतराज रेडियोग्राफी छ ।
शुक्रवारबाटै प्रदर्शनमा आएको अर्को चलचित्र हो ‘आचार्य’ । १३ वर्ष अघि नै निर्माण भएर प्रदर्शन समेत भइसकेको चलचित्रलाई स्वर्गीय भजन शिरोमणि भक्तराज आचार्यप्रति श्रद्धाञ्जली अर्पण गर्ने उद्देश्यले पुनः प्रदर्शनमा ल्याइएको हो । यस पटक प्रदर्शन हुने चलचित्रमा भक्तराजको निधन पश्चताका केही दृश्यहरू समेत समेटिएको बताइएको छ ।
चलचित्र प्रशान्त रसाइलीको निर्देशनमा तयार भएको हो । चलचित्रमा स्वर्गीय भजन शिरोमणि भक्तराज आचार्यको बाल्यकाल, सङ्घर्ष, सफलता र क्यान्सरका कारण जिब्रो नै काट्नु परेको परिस्थितिसम्मको कथा देखाइएको छ । चलचित्रमा भक्तराजको भूमिकामा उनकै जेठा छोरा सत्यराज आचार्यले अभिनय गरेका छन् ।
सत्यराजसँगै चलचित्रमा अरुणा कार्की, सुनील पोखरेल,विपिन कार्की, दयाहाङ राई, सौगात मल्ल लगायतका कलाकारहरूको समेत विशेष भूमिका रहेको छ। रोशन राई निर्माता रहेको चलचित्रको छायाङ्कन शैलेन्द्र डी कार्कीले गरेका हुन् । चलचित्रलाई शुत्रवारबाट प्रदर्शन गर्नकै लागि देवजंग थापाले पुनः सम्पादन गरेका छन् ।
Discussion about this post