बुटवलमा मातृभाषाको चलचित्र निर्माण, प्रवर्द्धन, सहकार्य र बजारीकरण विषयक बिचार गोष्ठी सम्पन्न

विशेष अनलाइन । रुपन्देहीको बुटवलमा एक दिने मातृभाषाको चलचित्र निर्माण, प्रवर्द्धन, सहकार्य र बजारीकरण र सम्मान विषयक बिचार गोष्ठी तथा अन्तरक्रिया कार्यक्रम सम्पन्न भएको छ । आदिवासी जनजाति मातृभाषा प्रवर्द्धन समितिका संयोजक ज्योतिराज राईको अध्यक्षतामा भएको कार्यक्रममा मगर, गुरुङ, थारु चलचित्रकर्मी तथा बुद्धिजीवीहरूको सहभागिता रहेको थियो ।

संयोजक ज्योतिराज राईले चलचित्र निर्माण गर्नु भन्दा अगाडी चलचित्र निर्माण गर्ने विषय वस्तुमाथि मेहनतका साथ गम्भीर भएर अध्ययन अनुसन्धान गर्नु पर्ने बताए । शनिवार बुटवलमा मातृभाषा चलचित्र प्रवर्धन समिति आदिवासी र जनजाति चलचित्र महासंघको आयोजना, चलचित्र विकास बोर्डको सहयोग र मगर चलचित्रकर्मी संघ रुपन्देहीको सह आयोजनामा सम्पन्न मातृभाषा चलचित्रको निर्माण प्रवर्धन बजारीकरण विषयक अन्तर्क्रिया कार्यक्रममा राईले यस्तो बताएका हुन् ।

चलचित्र विकास बोर्ड अन्तर्गतको ‘आदिवासी जनजाति मातृभाषा चलचित्र प्रवर्धन समिति’को संयोजक राईले आदिवासी र जनजाति चलचित्रको प्रवर्द्धनको लागी समिति गठन भइसकेकोले अबका दिनमा आदिवासी जनजाति चलचित्रहरूको प्रवर्द्धन र बजारीकरण सहज हुने राईको दाबी थियो । अब आदिवासी जनजाति चलचित्रहरू फेस्टिभल र च्यारिटीमा मात्र सीमित नभएर अन्य चलचित्रहरू सँग पनि प्रतिस्पर्धामा जाने भएकाले चलचित्र निर्माण गर्दा आदिवासी जनजातिहरूको भावनामा ठेस लाग्ने,उनीहरूको भाषा कला,साहित्य र संस्कृतिमा आँच आउने कुरामा ध्यान दिन जोड दिए । चलचित्र मार्फत अब आउने नयाँ पुस्तालाई नेपाली संस्कृति सिकाउने भएकाले पनि चलचित्र निर्माण गर्दा गम्भीर हुनुपर्नेमा राईको जोड थियो ।

कार्यक्रमका  प्रमुख अतिथि आदिवासी चलचित्रकर्मी महासंघका अध्यक्ष पुर्खाजीत राईले आदीवासीहरु नेपालका मूलवासी भएकाले हाम्रो भाषा नै नेपालको मूल भाषा भएकाले मूल भाषामा बनेका चलचित्रहरूलाई विश्व बजारमा पुर्‍याउने काम महासंघको भएको जिकिर गरे । चलचित्र मार्फत आदिवासीहरू आफ्नो भाषा, कला संस्कृति र परम्पराको संरक्षण गर्ने लागी परेको देखेर सरकार पक्षका ढोङगीहरु अत्तालिन थालेको आरोप समेत लगाए ।

कार्यक्रममा मातृभाषा र सामुदायिक मुद्दामा आधारित चलचित्र निर्माण, निर्देशन र प्रवर्द्धनमा विशेष योगदान पुर्‍याउने मेजन पुन मगर , धनबहादुर गुरुङ र छविलाल९कोपिला० चौधरीलाई सम्मान गरिएको थियो । कार्यक्रमका अर्का वक्ता कलाकार तथा निर्माता धनबहादुर गुरुङले सरकारले जनजातिहरूको भाषा संस्कृति लाई दमन गरेकै कारण आदिवासीहरुको कथामा निर्माण गरिएको चलचित्रहरूले बजार पाउन नसकेको बताए ।

अन्तरक्रिया कार्यक्रममा सहभागी वक्ताहरूले आदिवासी चलचित्रहरू सीमित समुदायमा मात्र नभई देशव्यापी रूपमा बजारीकरण हुनुपर्ने बताए ।आदिवासी जनजाति मातृभाषा प्रवर्द्धन समितिका संयोजक ज्योतिराज राईको अध्यक्षतामा भएको कार्यक्रममा मगर, गुरुङ, थारु चलचित्रकर्मी तथा बुद्धिजीवीहरूको सहभागिता रहेको थियो ।