बिशेष अनलाइन – एक समय नेपाली चलचित्र नगरीमा दीपक दीपाको टिम र भुवन केसीको सहकार्यमा चलचित्र निर्माण गर्ने चर्चा थियो । तर, अन्तत उक्त चर्चा चर्चामा नै सिमित बनेको थियो । नेपाली दर्शकले पनि एक पटक भुवन र दीपक दीपको सहकार्य हेर्न चाहेका छन् । चलचित्र निर्माण तथा प्रदर्शनका आधारमा दुबै टिम सफल मानिन्छन् । भुवनले निर्माण गरेका चलचित्रहरुलाई नेपाली दर्शकले रुचाएका छन् भने दीपक दीपाले निर्माण गरेको चलचित्रले त नेपाली चलचित्र इतिहासमै सबै भन्दा धेरै व्यापार गरेर रेकर्ड राख्न सफल भएका छन् ।
एक समय यी दुई टिमको सहकार्यमा चलचित्र निर्माणको तयारी नै भएको मिडियोमा खबर आएका थिए । चलचित्रमा दीपकराज गिरी र अनमोल केसीलाई मुख्य कलाकारका रुपमा प्रस्तुत गर्ने बताइएको थियो । उक्त खबरले नेपाली दर्शकलाई उत्साहित बनाएको थियो । निर्देशक तथा कलाकार दीपाश्री निरौलाले दर्शकको उक्त उत्साहलाई झुटो हुन नदिने बताएकी छन् ।
‘सम्झिनी पानी छम्किनी’ बोलको गीतको तीज भर्सनको भिडियो सार्वजनिक कार्यक्रममा बोल्दै दीपाले भुवन केसीको व्यानरसँग सहकार्य गरेर चलचित्र निर्माण गर्ने तयारी भइरहेको बताएकी छन् । उनले भुवन केसी र दीपक दीपाको टिमको सम्बन्ध राम्रो नभएका खवरहरु समेत मिडियामा आउने गरेको बताउदै उक्त खबरमा सत्यता नभएको बताइन् ।
भुवनले पनि दीपक दीपाको टिमसँग आफ्नो सधै सुमधुर सम्बन्ध रहेको बताए । उनले पनि सहकार्यमा चलचित्र निर्माणको तयारी भइरहेको पुष्टि गरेका छन् । कोरोना भाइरसको त्रास समाप्त हुने बित्तिकै चलचित्रको तयारीमा लाग्ने भुवनले बताएका छन् । दीपा र भुवनकै अभिव्यक्तीलाई हेर्दा ढिलो चाडो नेपाली दर्शकले दीपकराज गिरी र अनमोल केसीलाई एउटै चलचित्रमा पक्कै देख्न पाउने छन् ।
Discussion about this post