सुयोग गुरुङ निर्देशित चलचित्र ‘जेरीः अन टप’मा जसिता गुरुङको आगमन

विशेष अनलाइन । सुयोग गुरुङ निर्देशित चलचित्र ‘जेरीः अन टप’मा जसिता गुरुङको आगमन भएको छ । चलचित्र को निर्माणपक्षले नायिका जसिता गुरुङसँग आज फाइनल कुराकानी गरेको हो । अब, जसिताले पनि फिल्मको बिषयमा तयारी थालेकी छिन् । यस अघि नायक अनमोल केसी र नायिका आँचल शर्मा अनुबन्धित भइसकेका छन् ।

सरोज न्यौपानेको निर्माणमा तयार हुन लागेको यो चलचित्रलाई सुयोग गुरुङले निर्देशन गर्दैछन् । चलचित्रको प्रि–प्रोडक्शनको काम धमाधम चलिरहेको छ ।

चलचित्र ‘फर्की फर्की’मा अनमोल केसी र जसिता गुरुङ को जोडीलाई दर्शकले निकै रुचाएका थिए ।
चलचित्र ‘जेरीः अन टप’मा पनि जसिताको प्रवेश भएसँगै दर्शकका लागि तीन कलाकारको केमेष्ट्री विशेष हुने देखिन्छ । चलचित्रमा दीपक भण्डारीको पनि लगानी रहनेछ । यस चलचित्रको निर्माता रोहित अधिकारी हुन् ।

दुई नायिकाको बिषयमा निर्माता न्यौपाने भन्छन् –‘यो चलचित्रमा दुबै नायिका लिड भूमिकामा छन् । दुवैको भूमिका शक्तिशाली छ । यसपटक दर्शकले जेरीः अन टप हेर्दा थुप्रै कुराहरू पाउनुहुनेछ ।’

यस चलचित्रलाई लिएर नायक अनमोल केसी पनि निकै उत्साहित देखिएका छन् । उनले चलचित्रको कथावस्तु बलियो रहेको बताएका छन् । चलचित्रको छायांकन काठमाडौं, मुस्ताङ र लुक्लामा गरिनेछ ।