विशेष अनलाइन । यम शेर्पाको निर्देशनमा बनेको चलचित्र ‘मिरमिरे’ को माग विदेशमा ह्वात्तै बढेको छ। हालै पोस्टर सार्वजनिक भएपछि चलचित्रले अन्तर्राष्ट्रिय बजारमा राम्रो चर्चा पाइरहेको छ ।
माघे संक्रान्तिको अवसर पारेर आगामी माघ १ गतेदेखि प्रदर्शनमा आउन लागेको चलचित्रको अन्तर्राष्ट्रिय प्रदर्शन अधिकार बिक्री सुरु गरेको छ। पहिलो चरणमा इजरायल, युएई, कतार, बहराइन, र मलेसिया गरी ५ देशको प्रदर्शन अधिकार आशिष इन्टरटेन्मेन्ट नामक कम्पनीले खरिद गरेको छ।
‘जेरी अन टप’, ‘बलिदान’, ‘जनै हराएको मान्छे’, ‘पिताम्बर’, ‘होस्टेल ३’ जस्ता चलचित्रहरूलाई मध्यपूर्वका देशहरूमा सफलतापूर्वक प्रदर्शन गरिसकेको अनुभवी कम्पनी आशिष इन्टरटेन्मेन्टले ‘मिरमिरे’को चर्चा र सशक्त कलाकारहरूको उपस्थिति (स्टारकास्ट) लाई मध्यनजर गर्दै यसको राइट्स खरिद गरेको बताएको छ।
चलचित्रमा अभिनेता दयाहाङ राई, सिर्जना निङलेखु, र प्रकाश सपूत मुख्य भूमिकामा छन्। दयाहाङ र सिर्जनाले यसअघि शेर्पाको ‘कार्साङ’ र सफल चलचित्र ‘जारी २’ मा एकसाथ काम गरेका थिए। तर, अभिनेता दयाहाङ र बहुमुखी प्रतिभाका धनी प्रकाश सपूतले भने यही चलचित्र ‘मिरमिरे’ मार्फत पहिलो पटक सहकार्य गरेका छन्। यार्सा फिल्म्सको प्रस्तुतिमा रहेको यस चलचित्रमा माओत्से गुरुङ, छुल्ठिम गुरुङ र भोलाराज सापकोटा लगायतका कलाकारहरूको अभिनय रहेको छ।
निमु शेर्पा, छोङ्बा लामा शेर्पा र आङ्छिरिङ शेर्पा यस चलचित्रका निर्माता हुन्। चलचित्रमा आलोक शुक्लाको छायांकन रहेको छ। ‘मिरमिरे’ ले अन्तर्राष्ट्रिय बजारमा उत्साहजनक सुरुवात गरेको छ ।
Discussion about this post