विशेष अनलाइन । नेपालगन्जमा आज चलचित्र पत्रकार संघ नेपाल बाँकेले आफ्नो २६ औँ वार्षिकोत्सव तथा चलचित्र पत्रकारिता दिवसको अवसरमा दुई विशिष्ट व्यक्तित्वलाई सम्मानित गरेको छ। निर्देशक तथा डान्सर नवराज सुवेदी र पत्रकार सावित्री गिरीले यो विशेष सम्मान प्राप्त गरेका हुन्।
सुवेदीले दर्जनौँ म्युजिक भिडियो र लघु चलचित्र निर्देशनमार्फत मोफसलमा कला कर्मलाई जीवन्त राखेका छन्। उनलाई सम्मानस्वरूप तीन हजार एक सय रुपैयाँ नगद र प्रमाणपत्र प्रदान गरियो। यस्तै, चलचित्र पत्रकारितामा आफ्नो कलमलाई धार दिँदै आएको पत्रकार सावित्री गिरीलाई दुई हजार एक सय रुपैयाँ नगद र प्रमाणपत्रसहित सम्मान गरियो।
कार्यक्रमका प्रमुख अतिथि नेपाल पत्रकार महासंघ लुम्बिनी प्रदेशका अध्यक्ष शुक्ररिषि चौलागाईले चलचित्रसँगको आफ्नो पुरानो लगावको स्मरण गरे। उनले चलचित्र हेर्नका लागि गरेको संघर्ष र सिनेकर्मी, पत्रकार, सिनेमा हल, र दर्शकबीचको अटूट सम्बन्धबारे चर्चा गरे। उनले चलचित्र पत्रकार संघले यी पक्षहरूबीच समन्वयको सेतुको रूपमा काम गरिरहेकोमा प्रशंसा व्यक्त गरे।
नेपाल पत्रकार महासंघ बाँकेका अध्यक्ष नविन गिरिले नेपालगन्जमा सुविधा सम्पन्न फिल्म हल निर्माण भएकोमा गौरव महसुस गर्दै, यसले नेपाली चलचित्र उद्योगको व्यापारिक सम्भावनामा वृद्धि हुने बताए। उनले केन्द्रबाट आउने कलाकारहरूलाई स्थानीय पत्रकारसँग साक्षात्कार गराउने परम्परालाई निरन्तरता दिन पनि सुझाव दिए।
कार्यक्रममा पत्रकार निरज गौतम, संगीतकर्मी तथा संघका सल्लाहकार सुन्दर गुरुङ लगायतले चलचित्र पत्रकारिताको सिप अभिवृद्धिको महत्त्वबारे आफ्ना विचार राखे। अध्यक्ष रामचन्द्र पौडेलले आएका सुझावहरूलाई कार्यान्वयन गर्दै संघलाई अझ प्रभावकारी बनाउने प्रतिबद्धता व्यक्त गरे।
Discussion about this post