विशेष अनलाइन । नेपाली चलचित्र ‘महाभोज’ले सहकारी संस्थागत प्रणालीमा गुम्सिएका पीडाका गहिराइलाई पर्दामा उतार्दैछ। आइतबार दिउँसो काठमाडौंको क्युएफएक्स सिनेमा–राइजिङ मलमा आयोजित समारोहमा चलचित्रको साढे चार मिनेट लामो ट्रेलर सार्वजनिक गरियो। ट्रेलरले सहकारीमा फसेका सर्वसाधारणको कथालाई मार्मिक र यथार्थपरक शैलीमा उजागर गरेको छ।
दयाहाङ राई, आर्यन सिग्देल, खगेन्द्र लामिछाने, अञ्जना बराइली, मलिका महत, गौमाया गुरुङ, वसुन्धरा भुसाल र मोहन निरौलाको सशक्त अभिनयले चलचित्रलाई जीवन्त बनाएको छ। ट्रेलरमा सहकारीमा जम्मा गरिएको रकम नपाएर औषधि मात्र होइन, ज्यान नै गुमाउन पुगेका पात्रहरूको पीडादायी दृश्यले दर्शकको मन छोएको छ। जागिरे कर्मचारीको मनोवेदना र राजनीतिक चलखेलले समाजको कठोर यथार्थलाई उजागर गर्छ।
‘सत्य कहिल्यै लुक्दैन’ भन्ने नारासहित चलचित्रले सत्यको खोजीमा समाजमा हुने ठगी र अन्यायको पर्दाफास गर्ने प्रयास गरेको छ। निर्देशक दिनेश राउतले सहकारीमार्फत समाजमा हुने अन्याय र शोषणको कथा उजागर गर्न खोजेको बताए। निर्माता हिमाल कडरियाका अनुसार ‘महाभोज’ केवल पैसाको कथा होइन, समाजमा गुम्सिएका कथा र पीडाको दस्तावेज हो।
विकास सुवेदीको कथा तथा पटकथामा निर्माण भएको यस चलचित्रलाई क्लक वर्क क्रियशन र पिक्चर फ्रेमले निर्माण गरेका छन्। आर्यन सिग्देल, दयाहाङ राई, खगेन्द्र लामिछाने, अञ्जना बराइली लगायत कलाकारहरूको दमदार प्रस्तुति रहेको ‘महाभोज’ले सहकारी व्यवस्थामा रहेका विसंगतिलाई साहसिक रूपमा प्रस्तुत गरेको छ। चलचित्रमा सहकारीको कथा एक कारकमात्र हो, जसले समाजको चरित्रलाई उदाङ्गो बनाउँछ।
‘महाभोज’ले सहकारीमा जकडिएका पीडितहरूको आवाज बनेर समाजमा गडगडाहट ल्याउने अपेक्षा गरिएको छ।
Discussion about this post