‘एक्टरः टेक वान’को फर्स्टलुकमा प्रदीपको बहुरुपी चरित्र

विशेष अनलाइन । राजन भुसालको डेब्यु निर्देशनमा बनेको चलचित्र ‘एक्टरः टेक वान’ को फर्स्टलुक पोस्टर सार्वजनिक गरिएको छ । पोस्टरमा चलचित्रका मुख्य कलाकार प्रदीप खड्का फिचर्ड रहेका छन् ।सार्वजनिक पोस्टरले चलचित्रमा प्रदीपको बहुरुपी चरित्र रहेको देखाएको छ ।

आगामी कात्तिक १५ गते (लक्ष्मीपूजा)बाट प्रदर्शनमा आउन लागेको चलचित्रमा प्रदीपसहित आना शर्मा, राजबल्लभ कोइराला, दिव्य देव, दिव्या रायमाझी, सुशील सिटौला उषा रजक, सिर्जना अधिकारी, अनुज पाण्डे लगायत कलाकारहरुको अभिनय रहेको छ । अभिनेता दीलिप रायमाझीकी छोरी दिव्याको यही चलचित्रबाट डेब्यु भएको हो । राजबल्लभले १० वर्षपछि यसै चलचित्रबाट कमब्याक गरेका छन् ।

चलचित्रको निर्माता थमन कुमार भण्डारी रहेका छन् । निर्देशक भुसाल र आकाश बरालको लेखन रहेको चलचित्रमा नरेन्द्र मैनालीले छायांकन गरेका छन् । चलचित्रमा शिशिर खाती र किरण थापाको कोरियोग्राफी, अष्ट महर्जनको द्वन्द्व तथा निमेश श्रेष्ठको सम्पादन रहेको छ ।