चलचित्र ‘अग्निदहन’ले पोस्टर सर्वजानिक गर्दै तय गर्यो प्रदर्शन मिति

बिशेष अनलाइन । घनश्याम लामिछानेले निर्देशन गरेको चलचित्र ‘अग्निदहन’को प्रदर्शन मिति तय भएको छ । मंगलबार आयोजित कार्यक्रममा संचार तथा सूचना प्रविधिमन्त्री पृथ्वीसुब्बा गुरुङले प्रदर्शन मिति तय गर्दै चलचित्रको पोस्टर सार्वजनिक गरेका छन् । लामो पर्खाइपछि निर्माताले मंसिर ७ गते बोक्सी कुप्रथाविरुद्ध सामाजिक सन्देश दिने चलचित्र रिलिज हुने घोषणा गरेका हुन् ।

निर्देशक लामिछाने भन्छन्, “बोक्सी प्रथाको अन्धविश्वासर ‘मान्छे कोही पनि बोक्सी हुँदैन’भन्ने विषयलाई चलचित्रमा उठान गरिएको छ। चलचित्रमा थ्रिल, सस्पेन्स सबै छ । उपन्यासलाई हामीले सिनेम्याटिक तवरबाट चलचित्रमा उतारेका छौं । चलचित्रमा दर्शकले सन्देश र उत्सुकता दुवै पाउनुहुनेछ “।

चलचित्रका परिकल्पनाकार कोविदशरण उपाध्यायले चलचित्रलाई तराईका जिल्लामा प्रदर्शन गराउनका लागि मैथिली र भोजपुरी भाषामा समेत डबिङ गरिएको बताए । उनका अनुसार चलचित्र अंग्रेजी भाषामा पनि सबटाइटल गरिएको छ । वितरक डीसीएनका अशोक शर्माले ‘अग्निदहन’ व्यावसायिक चलचित्र नभएको बताए ।
चलचित्रमा प्रकाश घिमिरे, प्रमिला तुलाचन, माओत्से गुरुङ, अनुपमा भण्डारी, तुलसी क्षेत्री, विष्णु वास्तोला, ताराबहादुर गुरुङलगायत कलाकारको अभिनय रहेको छ ।

चलचित्रलाई निवर्तमान राष्ट्रपति विद्यादेवी भण्डारी, प्रधानमन्त्री केपी शर्मा ओली, निवर्तमान प्रधानमन्त्री पुष्पकमल दाहालले हेरिसकेका छन् । चलचित्रलाई चलचित्र विकास बोर्डले ‘विशेष चलचित्र अवार्ड’ समेत दिइसकेको छ ।