थारु संस्कृतिको रौनक बोकेको नयाँ गीत ‘चल्गे छौरी’ दर्शकमाझ

विशेष अनलाइन । थारु कला र संस्कृतिलाई आधुनिक धारासँग जोड्दै तयार गरिएको नयाँ गीत ‘चल्गे छौरी’ सार्वजनिक भएको छ। परम्परागत थारु लयलाई क्लब डान्सका ट्रेन्डी बिट्ससँग सन्तुलित रूपमा मिसाएर बनेको यो गीतलाई बगिया इन्टरटेन्मेन्टले दर्शकमाझ ल्याएको हो।

गीतका शब्द, सङ्गीत, स्वर र मुख्य अभिनय– सबै पक्षमा बहुप्रतिभाशाली कलाकार बालकृष्ण थारुकै योगदान छ। निर्माण पक्षले यस सिर्जनालाई बालकृष्णका स्वर्गीय मित्र पुष्प कुमार चौधरी (पुस्पे) को सम्झनामा विशेष रूपमा समर्पण गरेको जानकारी दिएको छ।

भिडियोमा बालकृष्ण थारुसँग रचना हजारीले सह-अभिनय गरेकी छन् भने एल.एन. गच्छदार अतिथि कलाकारको भूमिकामा देखिन्छन्। भिडियोलाई जय चौधरीले निर्देशन गरेका छन् भने नृत्य कोरियोग्राफी विवेक सरदारले गरेका छन्। आकर्षक छायाङ्कन र गतिमय सम्पादनको जिम्मा हेमन तामाङले सम्हालेका छन्।

विशेषगरी स्टेज शो, डीजे सेसन, र टिकटक क्रिएटरहरूलाई लक्षित गरेर निर्माण गरिएको ‘चल्गे छौरी’ले दर्शक–श्रोतालाई रमाइला थारु लयमा नचाउने निर्माण पक्षको अपेक्षा छ।