विशेष अनलाइन । नेपाली चलचित्र जगत्का वरिष्ठ कलाकार तथा निर्देशक निर शाहको निर्देशनमा तयार भइरहेको नयाँ चलचित्र ‘कमला मिस’ को छायाङ्कन सम्पन्न भएको छ। गत फागुन १ गतेदेखि सुरु भएको यस चलचित्रको छायाङ्कन करिब २३ दिनको निरन्तर प्रयासपछि मंगलबार सकिएको हो। बिचमा निर्वाचनका कारण तीन दिन काम रोकिए तापनि निर्माण पक्षले निर्धारित समयभित्रै छायाङ्कन पूरा गर्न सफल भएको छ।
मनोवैज्ञानिक कथावस्तुमा आधारित चलचित्र विजय मल्लको कथामा आधारित छ। निर्देशक शाहलाई लेखनमा पूर्वी सहर इटहरीका प्रजल दुलाल र सुगम दुलालले साथ दिएका छन्। चलचित्रको पटकथा तथा संवाद तयार पार्न प्रजलले निर्देशक शाहसँग संयुक्त रूपमा सहकार्य गरेका छन्। ‘वासुदेव’, ‘राजमती’, ‘वसन्ती’ र ‘सेतो बाघ’ जस्ता कालजयी चलचित्र दिएका शाह करिब एक दशकपछि निर्देशनमा फर्किएका हुन्।
चलचित्रमा स्वयं निर्देशक निर शाहका साथै रमेश बुढाथोकी, बासना तिमिल्सिना, शिवम सराफ क्षेत्री, आरभ दाहाल, भावना मगर, सुशान्त कुमार श्रेष्ठ, जयन्त रेग्मी, सुरेश थापा, राजन केसी र संजय खतिवडा लगायतका कलाकारहरूको अभिनय रहेको छ ।
विजय मल्ल स्मृति प्रतिष्ठानका लागि उमा मल्लले निर्माण गरेको यस चलचित्रका कार्यकारी निर्माता उमेश मल्ल र चैतन्य प्रधान हुन्। त्यस्तै, लाइन प्रोड्युसरका रूपमा पुस्कर लामा (प्रेम भोम्जन) ले व्यवस्थापकीय जिम्मेवारी सम्हालेका छन्। चलचित्रलाई शिवराम श्रेष्ठले छायाङ्कन गरेका हुन् भने युग भुसालको संगीत र रामजी लामिछानेको कोरियोग्राफी रहेको छ ।
Discussion about this post