विशेष अनलाइन । आगामी राम नवमीको अवसर पारेर चैत १३ गतेबाट देशभर प्रदर्शनमा आउन लागेको चलचित्र ”हामी तीन भाइ”को टिजर सार्वजनिक गरिएको छ। निर्माण पक्षले सोमबार फागु पूर्णिमा (होली) को विशेष अवसर पारेर सार्वजनिक भएको टिजरले चलचित्रको मुख्य कथावस्तु र परिवेशलाई संक्षिप्त रूपमा प्रस्ट्याएको छ।
सार्वजनिक टिजरमा तीनजना दाजुभाइको प्रगाढ आपसी मित्रता, उनीहरूको पारिवारिक सम्बन्ध र विवाहपश्चात् आउने विभिन्न उतारचढाव एवं मनमुटावलाई प्रमुखताका साथ देखाइएको छ। पारिवारिक ड्रामामा आधारित यो चलचित्रले दाजुभाइबीचको सम्बन्धमा आउने परिवर्तनलाई पर्दामा उतार्ने संकेत गरेको छ।
मधुसुदन भट्टराईको निर्देशनमा तयार भएको चलचित्रमा विनोद न्यौपाने, लक्ष्मी वर्देवा, कुशल बिष्ट, आश्मा गिरी, जाहन्वी बस्नेत, फलित राई, राजाराम पौडेल, रविन्द्र झा, बिष्णु सापकोटा, विकास चापागाईं, सुष्मा निरौला, यादव देवकोटा, अन्जु हमाल, तारा शर्मा, पवन केसी र विरेन श्रेष्ठ लगायतले अभिनय गरेका छन्।
प्राविधिक पक्षतर्फ साजित महत प्रस्तुतकर्ता रहेको यस चलचित्रमा शिवम् अधिकारीको लेखन, शिव ढकालको छायांकन र बनिष शाहको सम्पादन रहेको छ।चलचित्रमा कमल राईको नृत्य निर्देशन तथा साप शक्ति र बाबुल गिरीको संगीत रहेको छ ।
त्रिरत्न श्रेष्ठ र मनोज श्रेष्ठले निर्माण गरेको यस चलचित्रमा विक्रम तामाङ कार्यकारी निर्माताका रूपमा रहेका छन् भने भक्तलाल श्रेष्ठ, प्रतिमा थापा पोखरेल र दुर्गालक्ष्मी पाण्डे सह–निर्माता हुन्।
Discussion about this post