विशेष अनलाइन। आगामी फागुन १ गते महाशिवरात्रिको विशेष अवसर पारेर नेपाली चलचित्र ‘शिवांश’ प्रदर्शनमा आउने भएको छ। निर्माण पक्षले हालै सार्वजनिक गरेको नयाँ पोस्टर र जानकारी अनुसार यस चलचित्रमा विश्वप्रसिद्ध भारतीय गायक कैलाश खेरको स्वर सुन्न पाइनेछ। खेरले चलचित्रका लागि ‘शिव ताण्डव स्तोत्रम्’ गाएका छन् ।
गायक कैलाश खेरले एक भिडियो सन्देश जारी गर्दै नेपाली प्रशंसकहरूले आफ्नो सङ्गीतलाई दिने मायाप्रति आभार प्रकट गरेका छन्। उनले यो सांगीतिक परियोजनालाई भारत र नेपालको प्रगाढ मैत्री सम्बन्धको सौजन्य र प्रतीकका रूपमा चित्रण गरेका छन्। खेरको ओजपूर्ण स्वरले नेपाली दर्शकलाई छुट्टै सांगीतिक स्वाद दिने अपेक्षा निर्माण पक्षले राखेको छ।
चलचित्रको सार्वजनिक नयाँ पोस्टरले यसको कथावस्तु निकै तनावपूर्ण र प्रभावशाली रहेको संकेत गर्छ। पोस्टरमा प्रवीण खतिवडा हातमा चक्कु बोकेर रौद्र रूपमा देखिएका छन् भने तेज गिरी रिसाहा मुद्रामा प्रस्तुत छन्। विकाश जोसी डमरु समातेर चिच्याइरहेको अवस्थामा देखिँदा रुसा न्यौपाने र बिमला लिम्बूको अनुहारमा आश्चर्य र गम्भीरता झल्किएको छ। श्यामस्वेत रङको यो पोस्टरले पात्रहरूको जीवनको जटिलता र संघर्षलाई प्रतिविम्बित गरेको छ।
अञ्जान सिनेमा प्रोडक्सन हाउसको प्रस्तुति रहेको यस चलचित्रमार्फत सन्तोष कुमार आत्रेयले निर्देशनमा डेब्यु गर्दैछन्। अञ्जान केसीको कथा र बारत लिम्बूको पटकथा रहेको यस सिनेमामा सुलक्षण भारतीले ‘स्क्रिप्ट डक्टर’को भूमिका निभाएका छन्। चलचित्रमा प्रवीण खतिवडा, तेज गिरी, विमला लिम्बू, रुषा न्यौपाने, विकास जोशी, प्रदीप कुमार चौधरी लगायतका कलाकारहरूको सशक्त अभिनय रहनेछ।
प्राविधिक पक्षतर्फ चलचित्रमा न्ह्यू बज्राचार्य र राजनराज शिवाकोटीको संगीत रहेको छ भने मिलन नेवार र समीक्षा अधिकारीले पनि स्वर दिएका छन्। मिलन श्रेष्ठको द्वन्द्व निर्देशन र विक्रम चोहानको कोरियोग्राफी रहेको यो चलचित्रलाई सरद महतोले छायांकन गरेका हुन्। कार्यकारी निर्माता सम्भू थापा रहेको ‘शिवांश’लाई डिजिटल सिनेमा नेपाल (डीसीएन) ले देशभर वितरण गर्ने जिम्मेवारी लिएको छ।
Discussion about this post