विशेष अनलाइन । कलाकार जितु नेपाल (मुन्द्रे) को मुख्य भूमिका र निर्माण रहेको नयाँ चलचित्र ‘आइएम जितबहादुर’ को छायाङ्कन पूरा भएको छ । बिहीबार शंखमुलस्थित ‘ए–वान क्याफे’ मा जितु नेपालको अन्तिम दृश्य खिचेसँगै फिल्मको सम्पूर्ण छायाङ्कन कार्य सम्पन्न भएको हो । निर्माण पक्षले १५ दिनको छोटो अवधिमा चलचित्रको छायाङ्कन सकेको छ ।
चलचित्रमा जितु नेपालका साथै अभिनेत्री प्रियङ्का कार्की र वर्षा राउतको मुख्य भूमिका रहेको छ । साथै, चलचित्रमा नीति शाह र आर्यन सिग्देल जस्ता चर्चित कलाकारहरूलाई पनि विशेष भूमिकामा देख्न सकिनेछ । ‘आइएम जितबहादुर’ को निर्देशन भारतीय निर्देशक शुभेन्दु घोषले गरेका हुन् । उनले यसअघि हिन्दी र बङ्गाली भाषाका चलचित्रहरू निर्देशन गरिसकेका छन् ।
चलचित्रको कथावस्तु नेपाली कलाकारको सङ्घर्ष र सफलताको यात्रामा आधारित छ । विशेष कुरा त के छ भने, यो चलचित्रको कथा जितु नेपालको आफ्नै वास्तविक जीवन र कलाकारिता यात्रासँग पनि धेरै हदसम्म मेल खाने निर्माण पक्षले बताएको छ ।
लामो समयपछि जितु नेपाल आफैँले निर्माण गरेको र मुख्य भूमिकामा देखिएको यो चलचित्रले नेपाली सिने क्षेत्रमा कलाकारको वास्तविक पीडा र सफलताको कथालाई पर्दामा उतार्ने अपेक्षा गरिएको छ । अब फिल्मको सम्पादन र पोस्ट-प्रोडक्सनको काम सुरु हुनेछ ।
Discussion about this post