विशेष अनलाइन । नेपाली चलचित्रको संसार फेरि एकपटक हलचलमा परेको छ। बहुप्रतिक्षित चलचित्र ‘अभिमन्यु’ दशैंमा प्रदर्शन हुने तयारीमा रहेको बेला देशकै सबभन्दा ठूलो मल्टिप्लेक्स चेन क्यूएफएक्ससँगको असहज सम्बन्धले यसलाई विवादको भुमरीमा तानेको छ।
निर्माता विनोद पौडेलले खुलेर बताएका छन्— आफ्नो सिनेमा दशैंको फूलपातीमा दर्शकसम्म पुगोस् भन्ने चाहना भए पनि क्यूएफएक्सले ठूला तीन चलचित्रलाई प्राथमिकता दिँदै ‘अभिमन्यु’लाई शो नदिने निर्णय सुनाएको हो। “फूलपातीमा ‘बलिदान’, ‘माइतीघर’ र ‘हरिबहादुरको जुत्ता’ जस्ता ठूला फिल्महरू आउँदैछन्, तपाईंको चलचित्रलाई हामी कमिङ सुनमा समेत राख्न सक्दैनौँ” भन्ने जवाफ सुन्दा आफू र आफ्नो टिमलाई निकै हेपिएको अनुभूति भएको उनले गुनासो गरे।
तर, पौडेलका अनुसार सबै हलको व्यवहार क्यूएफएक्सजस्तो भएन। धेरैजसो सिंगल थिएटर र क्षेत्रीय हलहरूले भने खुलेरै साथ दिएका छन्। “कुन चलचित्र ठूलो, कुन सानो भन्ने कुरा दर्शकको निर्णयले मात्र हुने हो, न कि अग्रिम अनुमानले,” निर्माता पौडेलको स्पष्ट भनाइ छ। उनले वितरक र प्रदर्शकलाई नेपाली सिर्जनामा विश्वास गर्न आग्रह गर्दै भने, “नेपाली चलचित्रलाई विश्वास गर्नुस्, हामीसँग कथा छ, कला छ, अनि संघर्ष गर्ने साहस पनि छ।”
‘अभिमन्यु’ वास्तवमा विगत केही महिना यता निरन्तर चर्चामा छ। प्रारम्भिक रूपमा भदौ २७ मा रिलिज हुने भनिए पनि देशैभर फैलिएको जेन–जी आन्दोलनका कारण टिमले दशैंलाई लक्षित गर्ने निर्णय गरेको थियो। तर, त्यही समयमा विदेशी सुपरहिट ‘कान्तारा’ समेत आउने खबरले क्यूएफएक्स अझै सजग बनेको देखिन्छ। यसरी ठूला चलचित्रहरूको भीडबीच आफ्नो चलचित्रलाई पछाडि धकेलिएको महसुस हुनु निर्माताको पीडा हो।
पौडेलले थप स्पष्ट पारे— प्रचारप्रसारमै ठूलो बजेट लगानी गरिसकेको अवस्थामा अब लामो समय दर्शकलाई पर्खाइमा राख्नु गाह्रो छ। विदेशका लागि समेत शो तय भइसकेकाले मितिमा फेरबदल गर्ने विकल्प टिमसँग छैन। त्यसैले उनले हल सञ्चालकसँग सहानुभूति र समझदारीको अपेक्षा गरेका छन्।
सेभेन सिज सिनेमाको ब्यानरमा निर्माण भएको ‘अभिमन्यु’मा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल र शिशिर वाङ्देल जस्ता चर्चित कलाकारहरूको अभिनय छ। चलचित्रलाई सुशान्त गौतमले निर्देशन गरेका छन् भने क्रिएटिभ निर्देशक मदन थापा हुन्। मुकेश खनालको लेखनमा बनेको यो फिल्मलाई विनोद पौडेल र गुञ्जन गिरीले संयुक्त रूपमा निर्माण गरेका हुन्। सह–निर्मातामा रमेश चौलागाईं र हरि श्रेष्ठ छन् भने कार्यकारी निर्माताको जिम्मा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठले लिएका छन्।
‘अभिमन्यु’को प्राविधिक पक्ष पनि कम रोचक छैन। जीवन शाक्यको लाइन प्रोडक्सन, शरद महतोको डिओपी, मनोज श्रेष्ठको भिएफएक्स, जुनिम गहतराजको रंग संयोजन र मदन घिमिरेको सम्पादनले चलचित्रलाई दृश्य–सौन्दर्यको विशेष उचाइमा पुर्याउने विश्वास गरिएको छ।
नेपालमा दशैंमा प्रदर्शन रोकिए पनि यो चलचित्र असोज १७ गतेदेखि भारत र विश्वव्यापी रूपमा हिन्दी भाषामा एकैसाथ रिलिज हुँदैछ। यसरी ‘अभिमन्यु’ले सीमापारको यात्रा तय गर्दै अन्तर्राष्ट्रिय दर्शकमाझ आफूलाई प्रस्तुत गर्ने तयारी गरिरहेको छ।
दशैंको रमाइलो र चलचित्रको भीडबीच, ‘अभिमन्यु’लाई रोक्ने वा अगाडि बढाउने खेलले दर्शकलाई चासोमा पार्नु स्वाभाविक हो। तर, अन्ततः कुनै पनि चलचित्रको वास्तविक मूल्याङ्कन दर्शकको ताली, आँसु र भावनाले मात्र गर्नेछन्।
Discussion about this post