विशेष अनलाइन । अभिनेता तथा निर्देशक निखिल उप्रेतीको निर्देशनमा बन्ने नयाँ एक्सन-ड्रामा चलचित्र ‘आचार्य’ को छायांकन भदौ ५ गते (अगस्ट २१) बाट सुरु हुने भएको छ। चलचित्रको छायाङ्कन भारतको पश्चिम बंगालस्थित डुअर्स क्षेत्रबाट शुरु हुनेछ।
करिब ६० दिनको छायांकन तालिका तय गरिएको चलचित्रको पहिलो चरण २५ दिनसम्म भारतमा, त्यसपछि नेपालका विभिन्न स्थानमा खिचिनेछ। चलचित्रमा निखिल उप्रेती स्वयम् मुख्य भूमिकामा देखिने छन्। उनीसँगै पूर्णिका सिजापति, प्रमोद अग्रहरि, कामेश्वर चौरासिया र विशाल पहारी प्रमुख भूमिकामा रहनेछन्।
बलिउडका अभिनेता सुनिल सेट्टी चलचित्रमा देखिने सम्भावना छ भने सञ्जय मिश्र र रुस्लमान मुमताज को भूमिकाबारे पनि छलफल भइरहेको छ। मुमताजलाई एन्टी-हिरोको भूमिकामा प्रस्तुत गर्ने तयारी छ। नेपालतर्फको छायांकन काठमाडौंबाट सुरु भई स्याङ्जाको पहाडी भूगोल हुँदै पुनः काठमाडौंमै सम्पन्न हुनेछ।
चलचित्रले शान्ति, निडरता र मानसिक बलको सन्देश दिने निर्देशक उप्रेतीको भनाइ छ। चलचित्रको कथा लेखन पनि निखिल स्वयम्ले गरेका हुन्। उनले चलचित्रलाई महाभारतसँग तुलना गर्दै समाजमा हुने द्वन्द्वहरूको प्रतिनिधित्व गराउने प्रयास भएको बताएका छन्।
चलचित्रबाट अभिनेत्री सञ्चिता लुइँटेलले कोरियोग्राफर र प्रोडक्सन लिडरका रूपमा डेब्यु गर्दैछिन्। सन् २०१५ मा ‘भैरव’ निर्देशन गरेका निखिलका लागि ‘आचार्य’ दोस्रो निर्देशन हुनेछ। अभिनय यात्रा उनले सन् २००१ मा ‘पिँजडा’ बाट सुरु गरेका उप्रेतीले हालसम्म झण्डै १०० चलचित्रमा काम गरिसकेका छन्।
Discussion about this post